लण्डन । बेलायतमा नयाँ किसिमको कोरोना भाइरस फैलिएपछि युरोपलगायत विभिन्न राष्ट्रहरुले बेलायत आउने जाने स्थल तथा हवाई सम्पर्कमा बन्देज लगाएका छन् । सोमबार साँझ प्रधानमन्त्री कार्यालयमा आयोजित पत्रकार सम्मेलनमा बोल्दै प्रधानमन्त्री बोरिस जोन्सनले बेलायतमा खाद्यान्न र ओैषधि लगायतका वस्तुहरुको प्रशस्त संचय रहेको भन्दै बेलायतबासीलाई आश्वस्त पारेका छन् ।
नयाँ किसिमको भाइरस अति छिटो सर्ने भएका कारण फ्रान्सले आइतबार राति ११ बजेदेखि डोभर हुँदै फ्रान्स प्रवेश गर्ने मालबाहक सवारीसाधनहरुमा रोक लगाएको छ । प्रधानमन्त्री जोन्सनले यसबारेमा फ्रेन्च राष्ट्रपतिसित सोमबार कुराकानी भइसकेको बताउँदै छिटोभन्दा छिटो सो समस्या समाधान गर्न दुवै पक्ष आतुर रहेको बताएका छन् ।
२० प्रतिशत मात्र सामानहरु सो बाटो भएर युरोपबाट बेलायत आउने भएकाले त्यसले बेलायतमा ठूलो असर नपार्ने पनि जोनसनले प्रष्ट पारे ।
विभिन्न मुलुकहरुले बेलायतसितको सम्पर्क हाल स्थगन गरेकोप्रति प्रधानमन्त्री जोनसनले भने, ”तपाईहरुको चासो हामीले सुन्यौँ । भारइसको नयाँ प्रकार देखिनासाथ हामीले विश्व स्वास्थ्य संगठनलाई खबर गरिसकेका छौं र आशा छ चाँडै नियन्त्रणमा आउला ।”
यातायात मन्त्री ग्रान्ट सापले हिजो राति डोभरबाट फ्रान्स जाने मालबाहक सवारीसाधनहरुको करिब पाँचसय वटा ताँती रहे पनि सोमबार अपराह्नसम्ममा १७४ वटा मात्र रहेको बताए ।
