बेलायतमा काम गर्न चाहने विदेशी नागरिकका लागि म‌‌ङ्गलबारदेखि भिसा आवेदन खुला

लण्डन । ब्रेक्जिटपछि बेलायतमा काम गर्न चाहने श्रमिक र अन्यका लागि मंगलबारदेखि भिसा आवेदन खुला हुँदैछ ।

युरोपियन मुलुकलगायत सबै विदेशी मुलुकका नागरिकले जनवरी १, २०२१ देखि बेलायतमा काम गर्नका लागि भिसा आवेदन गर्नु पर्नेछ र उनीहरुले अनलाइनबाट भिसा आवेदन गर्न पर्ने छ ।

दक्ष कामदारहरुले भिसाका लागि जब अफर पाउनु पर्नेछ साथै अंग्रेजीमा दक्षता र वार्षिक २५ हजार ६०० पाउण्ड तलब पाउने हुनुपर्नेछ ।

उता अहिले बेलायतमा रहिरहेका युरोपियन मुलुकका नागरिकहरुले भने ३० जनवरी २०२१ सम्ममा बेलायतमा बसोबासका लागि आवेदन दिइसक्नुपर्नेछ । उनीहरुको आवेदन सफल भएमा उनीहरु बेलायतमा बसोबास गर्न र अहिले प्राप्त सुविधाहरु पाउन योग्य हुनेछन् अन्यथा उनीहरुले बेलायत छोड्नपर्ने हुन्छ ।

आयरल्याण्डका नागरिकहरुले भने कुनै यस्तो कुनै पनि किसिमको आवेदन दिन पर्ने छैन ।

ब्रेक्जिटपछि युकेको अध्यागमन प्रणालीमा व्यापक परिवर्तन हुँदैछ । सोअन्तर्गत विभिन्न बाटोबाट युके आउनका लागि मंगलबारबाट आवेदन शुरु हुनेछ ।

दक्ष कामदारका लागि नम्बरमा आधारित अध्यागमन प्रणाली ल्याइएको छ । यस भिसाका लागि आवेदन गर्दा ६१० देखि १ हजार ४०८ पाउण्डसम्म लाग्ने बताइएको छ । यसबाहेक आवेदकले पुग्दो बैँक सन्चिती पनि देखाउनु पर्नेछ । आवेदन गरेको तीन सातामा उनीहरुको आवेदन सफल भए नभएको थाहा दिइने बताइएको छ ।

यसैगरी बेलायत सरकारले ग्लोबल ट्यालेण्ट, इन्नोभेटर र स्टार्ट अप भिसा योजना पनि ल्याएको छ । जसबाट तीक्ष्ण, नवीन सोचाइ भएका र व्यावसायिक प्रतिभाहरुलाई बेलायत भित्र्याउने योजना ल्याएको छ ।

बेलायतकी गृह मन्त्री प्रीति पटेलले नयाँ अध्यागमन प्रणाली सरल, प्रभावकारी र लचिलो हुने र बेलायतमा रहेको विभिन्न सीपको कमीलाई पूरा गर्ने किसिमको भएको बताएकी छिन् ।