एनआरएनएमा बिकृति नेकपा र काँग्रेसका प्रवासी संगठनहरुले ल्याए: अध्यक्ष पन्त (भिडियोसहित)

 

बेल्जियम । गैरआवासीय नेपाली संघ (एनआरएनए) अध्यक्ष कुमार पन्तले संघ भित्र बिकृति फैलाउने काम नेकपा निकट प्रवासी नेपाली मंच (ओएनएफयु)हरु र काग्रेस निकट जनसम्पर्क समिति (एनपिसीसी)हरुले गरेको आरोप लगाएका छन् । नेकपा स्रोतका अनुसार ओएनएफयु जर्मनीमार्फत नेकपामा लेवी तिर्दै आएका संघ अध्यक्ष पन्तले नेकपा र काग्रेसका प्रवासी नेताहरुलाई संस्थामा बिकृति भित्र्याउने मुख्य दोषीका रुपमा प्रस्तुत गरेका हुन् ।

त्यसमा कुन कुन नेताहरु संलग्न छन् भन्ने बारेमा उनी मौन रहे । बेल्जियममा आइतबार जुममार्फत भएको साधारण सभामा कडा रुपमा प्रस्तुत भएका पन्तले भने, ‘जनसम्पर्क समिति, ओएनएफ, एनडिएफ (पूर्व एमाले निकट) के-के रातभरि बैठक बस्ने त्यो निर्णय लागू गर्न संघलाई क्रिडास्थल बनाउने नराम्रो काम भैरहेको छ । यसलाई हामीले रोक्नु पर्छ ।’ अध्यक्ष पन्तले संस्थालाई राजनीतिकरण गर्ने घृणित कार्य जुन गरिएको त्यसलाई प्रतिवाद गर्नका लागि आफू सक्षम रहेको जवाफ दिएका छन् ।
‘विशेष महाधिवेशन’ जनवरीको अन्तिम साता तोकिसकेको अवस्थामा राजनीतिक स्वार्थसिद्धका लागि संस्थालाई प्रयोग गर्न खोजिएको उनले दावी गरे ।

‘गुटमा पहिल्यै एउटा कुरा बनाएर आएर पस्किने काम गरिएको छ । त्यसलाई वेवास्ता गरिन्छ ‘, उनले भने । ८० लाख एनआरएनएहरुलाई मिलेर बस्न नदिनु अपराध भएको दावी गर्दै उनले क्षणिक स्वार्थसिद्धी गरी एनआरएनए धुजा-धुजा गर्न धेरै मानिस लागेको जिकिर गरे । अध्यक्ष पन्तले पार्टीका विकृति फैलाउने सम्बन्धी समूहहरुमा बारेमा थाहा भएकाले त्यसमा नलाग्न आग्रह गरे । निर्वाचनमा विकृति भएको स्वीकारोक्ति समेत उनको थियो ।
गत निर्वाचनमा नेकपाका अध्यक्ष केपी ओलीकै सरकारको समर्थन पन्तलाई थियो । अर्का अध्यक्ष पुष्पकमल दाहाल (प्रचण्ड)सँग समर्थन लिएवापत सचिव पदका उम्मेदवारी हाल्ने तयारी गरिरहेका डिबी क्षेत्रीलाई प्रवक्तामा राख्ने सहमति गरेका थिए । सोही सहमतिका कारण प्रचण्ड निकट क्षेत्री संघका प्रवक्ता छन्। नवौं सम्मेलन अघि भीम रावलसँग निकट सम्बन्ध राख्नका लागि पन्त उनको घर केही मंहगो रकममा खरीद समेत गरेका थिए ।
एनआरएनए स्रोतका अनुसार गत वर्ष काठमाडौंमा सम्पन्न नवौं सम्मेलनमा निर्वाचनमा भाग लिएकामध्ये नेकपाको कोटामा अध्यक्ष पन्त, उपाध्यक्ष डा. बद्री केसी, उपाध्यक्ष अर्जुनकुमार श्रेष्ठ, सचिव आरके शर्मा, सहकोषाध्यक्ष लोक दाहाल र प्रवक्ता डिबी क्षेत्री आइसीसीमा छन । त्यस्तै, कांग्रेसको कोटाबाट निर्वाचनमा भाग लिएकामध्ये उपाध्यक्षद्वय मन केसी, रविना थापा, महासचिव डा. हेमराज शर्मा, सचिव गौरीराज जोशी र कोषाध्यक्ष महेश श्रेष्ठ कार्यसमितिमा छन् । एनआरएनए निर्वाचनमा निर्वाचित हुनका लागि प्राय: सबै उम्मेदवारहरु नेताहरुको घर-घर पुगेका थिए ।