बेलायतले मगायो थप २० लाख डोज मोडनाको कोरोना भाइरसविरुद्धको खोप

लण्डन । बेलायतले मोडना कम्पनीले विकसित गरेको कोरोना भाइरसविरुद्धको खोप थप २० लाख डोज मगाएको छ ।

यसबारेमा बेलायत सरकार र मोडनाबीच आइतबार हस्ताक्षर सम्पन्न भएको छ । योसँगै बेलायतले कुल ७० लाख डोज मोडनाको खोप मगाएको छ ।  यसबाट ३५ लाख मानिसहरुलाई खोप लगाउन पुग्ने बताइएको छ ।

मोडनाको खोपको तेस्रो चरणको परीक्षणमा ९५ प्रतिशत प्रभावकारी रहेको तथ्यांक सार्वजनिक भएको थियो । यो खोप फाइजरको खोपभन्दा भण्डारण र ओसारपसारमा सजिलो हुने बताइएको छ ।

बेलायतमा सो खोप दिनका लागि बेलायतको खोपसम्बन्धी नियामक निकाय मेडिसिन्स एण्ड हेल्थकेयर प्रोडक्ट्स रेगुलेटरी एजेन्सी (एमएचआरए) बाट अनुमति पाउनु पर्दछ । यदि एमएचआरएबाट अनुमति पाएको खण्डमा अर्को वर्षको वसन्त यामसम्ममा सो खोप सर्वसाधारणलाई लगाउन सकिने बताइएको छ ।

हालसम्म बेलायतले विभिन्न सातवटा कम्पनीका करोड ७० लाख डोज खोप मगाइसकेको छ । जसमा अक्सफोर्ड र आष्ट्राजेनिकाको १० करोड डोज, फाइजरको चार करोड डोज, नोभाभाक्सको ६ करोड डोज, भाल्नेभाको ६ करोड डोज, जीएसकेको ६ करोड डोज र जानसेनको ३ करोड डोज रहेका छन् ।