हङकङको आगलागीमा बितेका सातै जनाको सनाखत

लण्डन । हङकङमा आगलागीमा बितेका सातै जनाको सनाखत भएको छ ।

हङकङका सरकारी अधिकारीले दिएको सूचना अनुसार मृत्यु हुनेहरुमा ३८ वर्षीय युवराज कँडेल, उनकी छोरी १३ वर्षीया कृतिका कँडेल, कँडेलका ज्वाइँ ३५ वर्षीय रामबाबु नेपाल र नेपालका छोरा ९ वर्षीय रायन नेपाल रहेका छन् ।

कँडेलका श्रीमती गीता कँडेलको अति गम्भीर अवस्थामा क्वीन एलिजावेथ अस्पतालमा उपचार भइरहेको छ । कँडेलका ३ वर्षीय छोराको अवस्थामा सामान्य रहेको छ ।

उता रामबाबुकी श्रीमती तुलसी र उनका सात वर्षीय छोरा दुवैको अवस्था सामान्य छ र उनीहरु घर फर्किसकेका छन् ।

यसैगरी, ३९ वर्षीय शेरबहादुर तामाङ, ३२ वर्षीया अनिता निरौला र ४० वर्षीया विनिता तामाङको पनि घटनामा निधन भएको छ । विनिताका पति मुकेश श्रेष्ठको अवस्था चिन्ताजनक छ । उनको क्वाङ वा अस्पतालमा उपचार भइरहेको छ ।

घटनामा घाइते युवराज कँडेलका भाइ कृष्णबहादुर कँडेल, उनकी श्रीमती देवकी कँडेल, छोरी शुभेच्छा र छोरा शालिग्रामको अस्पतालमा उपचार भइरहेको छ । उनीहरुको अवस्था चिन्ताजनक रहेको बताइएको छ ।

घटनामा घाइते सावित्रा थापा, हस्तमाया धिमाल राई र आङ लाक्पाको उपचार भइरहेको छ ।

जन्मदिन मनाउने क्रममा हङकङको वाउमातेउमा रहेको जिरे खुर्सानी रेस्टरेन्टमा कँडेल परिवार पुगेका बेला आइतबार राति आगलागी भएको थियो ।