लण्डन । किँग्स कलेज लण्डनले कस्ता व्यक्तिलाई कोरोना भाइरसले लामो समय सताउँछ भन्ने बारेमा गरेको एक अनुसन्धानको हालै परिणाम सार्वजनिक गरिएको छ ।
बीबीसीका अनुसार सो अध्ययनमा हरेक २० जना कोरोना संक्रमितमध्ये एक जना आठ हप्तासम्म कोरोना भाइरसबाट बिरामी भएको पाइएको छ । अध्ययनले कोरोनाले सबै खालका व्यक्तिलाई लामो समय थला पार्न सक्ने तर महिला, मोटो व्यक्ति र दमका रोगीलाई कोरोना भाइरसले लामो समय सताउन सक्ने खतरा रहेको देखाएको छ ।
किंग्स कलेज लण्डनका डा. क्लेयर स्टिभ्सका अनुसार पहिलो हप्तामा पाँचवटा भन्दा धेरै लक्षण देखा पर्यो भने त्यो कोरोनाले लामो समय सताउने संकेत हुनसक्ने बताइन् ।
कसैलाई खोकी, थकान, टाउको दुख्ने, पखाला लाग्ने र गन्ध थाहा नपाउने लक्षण देखियो भने उसलाई कोरोनाले लामो समय सताउन सक्ने सम्भावना रहेको बताइएको छ ।
यस्तै, ५० वर्षभन्दा धेरै उमेरकालाई र महिलालाई कोरोनाले लामो समय सताउन सक्ने अनुसन्धानले देखाएको छ । डा. स्टिभ्सले भनिन्,’हामीले शुरुवातको तथ्यांकबाट पुरुषहरु गम्भीर रोगबाट ग्रसित हुने र कोरोनाबाट ज्यान गुमाउने खतरा देखियो भने महिलाहरुमा कोरोनाले लामो समयसम्म सताउने खतरा देखियो ।’
यसैगरी, फोक्सोको रोग र दम भएकाबाहेक अन्य स्वास्थ्य समस्या भएकाहरुलाई कोरोना भाइरसले लामो समय सताउने प्रमाण नदेखिएको बताइएको छ ।
कोरोनाले लामो समयले सताउने संकेत व्यक्तिअनुसार फरक फरक भए पनि थकान साझा संकेत भएको अध्ययनले देखाएको छ । अध्ययनले कोरोना संक्रमितमध्ये सातजनामा एक जना कम्ती चार हप्ता बिरामी भएको, २० जनामा एक जना आठ हप्ता बिरामी भएको र ४५ वा एक जना १२ हप्ता बिरामी भएको पुष्टि गरेको छ ।
