बेलायती प्रधानमन्त्री पिता मास्क बिनै पत्रिका किन्दै

तस्वीर गोफफोटो

लण्डन । बेलायतका प्रधानमन्त्री बोरिस जोन्सन नेतृत्वको सरकारले कोरोना भाइरसको संक्रमण नियन्त्रण गर्न जुलाई २४ देखि नै पसल तथा सुपरस्टोरहरुमा मास्क लगाउन अनिवार्य गरे पनि उनकै पिता भने मास्क नलगाई किनमेल गरिरहेको पाइएको छ ।

डेली मेलका अनुसार प्रधानमन्त्री जोन्सनका ८० वर्षीय पिता स्टान्ले जोन्सन यही मंगलबार पश्चिमी लण्डनको एक पसलमा बिना मास्क पत्रिका किन्दै गरेको अवस्थामा भेटिएका छन् ।

कन्जरभेटिभ पार्टीका तर्फबाट युरोपेली संसदका पूर्व सांसदसमेत रहेका जोन्सनले आफू तीन साता देशबाहिर बसेर त्यसै दिन बेलायत आइपुगेको बताउँदै माफी मागेका छन् । तर सो कारण नै नियम पालना नगर्नुको बहाना हुन नसक्ने पनि उनले बताए ।

उनले ट्याक्सी चालकले पत्रिका किनेर ल्याइदिन्छु भन्दाभन्दै आफैँ पत्रिका किन्न गएको बताएका छन् ।

उनले कोरोना भाइरस नियन्त्रणका लागि मास्क लगाउने लगायत सामाजिक दुरी कायम गर्न पनि सबैसित अनुरोध गरेका छन् ।

सरकारले पसलमा मास्क नलगाउनेका लागि पहिलोपटक २०० पाउण्ड जरिवाना तोकेको छ । तर उनलाई प्रहरीले जरिवाना गर्यो गरेन भन्ने चाहिँ समाचारमा खुलाइएको छैन ।

 

प्रतिक्रिया

सम्बन्धित सामाग्री