इङ्ल्याण्डमा आइसोसेलनमा नबस्नेलाई १० हजार पाउण्डसम्म जरिवाना

लण्डन । कोरोना भाइरसको संक्रमणलाई नियन्त्रण गर्न बेलायत सरकारले इङ्ल्याण्डमा सेल्फ आइसोलेसनमा नबस्नेलाई १० हजार पाउण्डसम्म जरिवाना गर्ने नियम ल्याएको छ ।

यसअघि सेल्फ आइसोसेलन सुझाव मात्र रहने गरेकोमा अब कानुनको पाटो बनाइएको हो ।

नयाँ नियम सेप्टेम्बर २८ देखि लागू हुने बताइएको छ ।

शुरुमा सेल्फ आइसोलेसनमा नबसे १ हजार पाउण्ड जरिवाना हुनेछ । तर पटकपटक उल्लंघन गरेमा जरिवाना १० हजार पाउण्डसम्म जानसक्ने छ ।

नयाँ नियमका बारेमा बेलायती प्रधानमन्त्री बोरिस जोन्सनले सबैले नियम पालना गर्नु नै भाइरससित लड्ने उत्तम उपाय भएको बताएका छन् ।

नयाँ नियमको अर्थ अब एनएचएसको कन्ट्याक्ट टेष्ट एण्ड ट्रयासले आइसोलेसनमा बस्न अनुरोध गरेमा त्यो कानुनी रुपमै बाध्यकारी हुने उनले प्रष्ट पारे । जसले नियमको पालना गर्दैन उसले गतिलो हर्जाना तिर्नपर्ने पनि उनले बताए ।

इङ्ल्याण्डको नियम अनुसार कोरोना पोजिटिभ देखिएका र उनीहरुको सम्पर्कमा आएका व्यक्तिहरुले आइसोलेसनमा बस्नपर्ने हुन्छ । यस्तै सरकारले आइसोलेसनमा बस्न नपर्ने सूचीमा नपरेका देशहरुबाट इङल्याण्डमा आउँदा पनि आइसोलेसनमा बस्नपर्ने हुन्छ ।

सरकारले आफ्ना कामदारलाई आइसोसेलनमा बस्नलाई प्रोत्साहन नगर्ने रोजगारदातालाई पनि जरिवाना गर्ने भएको छ ।

आइसोसेलनमा बसे नबसेको स्थानीय काउन्सिलका साथै प्रहरीले अनुगमन गर्ने बताइएको छ । यस्तै एनएचएसको टेष्ट एण्ट ट्रयासबाट फोन गर्नेहरुले पनि नियमित रुपमा सम्पर्क गर्नेछन् र आइसोलेसनमा नबसेको पाएमा प्रहरीलाई खबर गर्नेछन् ।

यस्तै सरकारी भत्तामा आश्रित वा कम आय भएका व्यक्तिहरुलाई आइसोलेसनमा बस्न परे सरकारले आर्थिक सुविधा उपलब्ध गराउने पनि नयाँ व्यवस्था गरिएको छ । यस्तो सुविधा अक्टोबर १२ देखि दिइने बताइएको छ । तर सो अविध अघि नै आइसोलेसनमा बस्न परेकाहरुलाई पनि यस्तो सहयोग दिइने छ ।