बेलायतद्वारा कोरोनाविरुद्ध बन्ने ९ करोड खोप अग्रिम बुक

लण्डन । बेलायत सरकारले कोरोना भाइरसविरुद्ध विकसित गरिन लागेका खोपहरुमा साझेदारीमार्फत उत्पादकसित ९ करोड डोज अग्रिम बुक गरेको छ ।

सरकारले बायोनटेक र पिफाइजरले परीक्षण गरिरहेको खोपको ३ करोड डोज बुक गरेको छ । हाल सो खोपको परीक्षण दोस्रो चरणमा छ ।

यस्तै, भाल्नेभा नामक कम्पनीले उत्पादन गर्न लागेको खोपको ६ करोड डोजका लागि सरकारले बुक गरेको छ । यदि सो खोपको परीक्षण सफल र प्रभावकारी ठहरिएमा थप ४ करोड डोजका लागि पनि सरकारले सम्झौता गरिसकेको छ ।

स्कटल्याण्डमा कारखाना रहेको भाल्नेभाका लागि सरकारले क्लिनिकल परीक्षणका लागि खर्च ब्यहोरिदने बताइएको छ ।

यसैगरी, सरकारले अक्सफोर्ड विश्वविद्यालयसित मिलेर खोप उत्पादन गर्न लागेको आष्ट्रजेन्कासित दश लाख डोजका लागि सम्झौता गरेको छ । यो खोपको विकासमा सरकारको समेत लगानी छ ।

इङल्याण्ड,स्कटल्याण्ड, वेल्स र नर्देन आयरल्याण्डका लागि प्रशस्त खोपको डोज पुगोस् भनेर सरकारले यो कदम चालेको बताइएको छ ।

व्यापार मन्त्री आलोक शर्माले साझेदारीमार्फत जोखिममा रहेकाहरुका लागि प्रस्तावित खोपहरुको जोहो गरिएको बताए ।

खोप कार्यदलको अध्यक्ष केट बिङघमले भनिन्, ”म आशावादी रहन अनुरोध गर्दछु किनकी धेरै सम्भाव्य खोपहरुको चर्चा भइरहेको छ तर तथ्य यो छ कि खोप नबन्न पनि सक्छ वा खोप बनिहालेमा त्यसले भारइस लाग्न नदिन होइन लक्षण घटाउन मात्र काम गर्न सक्छ ।”