कोरोनामुक्त हुनै आँट्यो स्कटल्याण्ड

लण्डन । स्कटल्याण्डमा विगत तीन दिनमा कसैको पनि कोरोना संक्रमणबाट मृत्यु भएको छैन ।

स्कटल्याण्डकी प्रथम मन्त्री निकोला स्टरजनले स्कटल्याण्ड कोरोना भाइरस मुक्त हुन दिशामा नजिकै पुगेको बताएकी छिन् ।

स्कटल्याण्डमा हालसम्म कोरोना संक्रमणबाट २ हजार ४८२ जनाको मृत्यु भएको छ । यसैगरी संक्रमण हुनेहरुको संख्या १८ हजार २३६ रहेको छ । आइतबार घोषित विवरणमा गत २४ घन्टामा ८ जनामा नयाँ संक्रमण देखिएको बताइएको छ ।

संक्रमित भई अस्पताल भर्ना भएकामध्ये ४ हजार ५० जना निको भई घर फर्किसकेका छन् । हाल ४६० जना विभिन्न अस्पतालमा उपचाररत छन् । जसमध्ये ५ जना सघन उपचार कक्ष (आइसियु) मा उपचाररत छन् ।

आइतबार ट्वीटमार्फत प्रथम मन्त्री स्टरजनले लगातार तीन दिन कोरोना संक्रमणबाट कसैको ज्यान नगएको जानकारी दिँदा आरामको अनुभूति भएको बताएकी छिन् । उनले सबै मिलेमा कोरोना नियन्त्रण गर्न सकिने पनि उल्लेख गरेकी छिन् ।

कोरोना संक्रमणको संख्या घट्दै गएपछि लकडाउन खुकुलो हुँदै जाने अपेक्षा गरिएको छ ।