शुक्रबार, असार १९ २०७७ | Fri, July 03, 2020
नेपालको समय: ०१:२१ | UK Time: 20:36

युकेबाट नेपाल जान चार्टर्डभन्दा सस्तोमा कतार एयरवेजको नियमित फ्लाईट !

वीनेपाली
२०७७ असार १५ गते ८:३२

लण्डन । नेपाल सरकारसित समन्वय गरी ब्यवस्थापन गरिएको चार्टर फ्लाईटभन्दा लण्डनबाट काठमाडौँ जान अनलाइनमा खोजी गर्दा हवाईजहाजको भाडा दर सस्तो भेटिएको छ ।

यसअघि लण्डनस्थित नेपाली दुताबाससमेतको पहलकदमीमा जुन २६ र २८ मा गरिएको जजिरा एयरवेजको चार्टर उडान तथा आगामी २९ जुन र २ जुलाई गरी युके तथा युरोपबाट नेपालीहरुलाई स्वदेश फर्काउन ट्राभल्स कन्सोलले तय गरेको भन्दा निकै सस्तो दररेटमा अनलाइनमा दुईतर्फी टिकट पाइएका छन् । अनलाईन सर्च इन्जिन गुगलमा खोजी गर्दा थुप्रै अनलाईन टिकेटिङ प्लाटफर्महरुले सस्तो भाडादरमै बेलायतबाट काठमाडौंका लागि उडान भरिरहेका छन् ।

हवाइ उडानमा विश्वभर नाम कमाएको कतार एयरवेजले नै करिब ९ सय पाउण्ड भन्दा सस्तोमा दुईतर्फी उडान भरिरहेको छ । तर ती अनलाईनमा देखाइएका टिकटहरुमा  ट्रान्जिटमा कनेक्टिङ फ्लाईटका लागि केही लामो समय खर्चिनु भने पर्नेछ । ओपोडो, चिप फ्लाईट,स्काई स्क्यानर, कायकलगायतका अनलाईनमा त्यस्ता टिकटहरु पाउन सकिन्छ । तर, ती फ्लाईटहरुका लागि दुई साता अघिको योजना बनाउनु पर्नेछ ।

हाल नेपाल सरकारले सीमित एयरलाइन्सलाई मात्र अन्तर्राष्ट्रिय उडान भर्न अनुमति दिएको छ । त्यसमध्ये कतार एयरवेज एक हो ।

सरकारले उद्धारका लागि गत २४ र २६ जुनमा बेलायतबाट उडान भर्न अनुमति दिएको जजिरा एयरवेजले एकतर्फी भाडा नै ९ सय ४० पाउण्ड लिएको थियो । त्यस्तै, जुन २९ र २ जुलाईका लागि तय भएको कतार एयरवेजकै चार्टर फ्लाईटका लागि १ हजार १५० देखि १ हजार ३ सय यूएस डलरसम्म भाडा तोकिइएको छ ।

उता नट जष्ट ट्राभल्स युकेका निर्देशक विष्णु सुब्बा भने टिकेटिङ प्राइस कम्पेरिजन साइटहरुमा देखाइएको मूल्यमा टिकट प्राप्त हुन सक्ने सम्भावना कम रहेको बताउँछन् । त्यस्तै त्यस्ता उडानहरु रद्द हुने सम्भावना पनि उत्तिकै रहने अनि पैसा फिर्ताको प्रक्रिया पनि झन्झटिलो हुनसक्ने जोखिम उनी ओ‌ैँल्याउँछन् । उनी भन्छन्, ‘सके सीधा एयरलाइन्सबाट वा आफूले चिनेको एजेन्सीबाट टिकट लिँदा कम तनाव हुन्छ ।’

प्रतिक्रिया

सम्बन्धित सामाग्री

फेसबुक