तस्विर : एभियसन प्रोस
लण्डन । कोरोना महामारीका कारण बेलायतमा अड्किएका नेपालीहरुलाई उद्धार गर्नका लागि नेपाल सरकारले चार्टर गरेको अन्तिम उडानमा आज ८३ जना यात्रु नेपालतर्फ प्रस्थान गरेका छन् ।
नेपाली दुताबास लण्डनका उपनियोग प्रमुख तथा प्रवक्ता शरदराज आरनका अनुसार बेलायतबाट नेपाल जाने अन्तिम उडानमा ८३ जना यात्रु जजिरा एयरलाइन्समार्फत नेपालतर्फको उडान भरेका हुन् ।
दुताबासले दुई उडानमा १५८/१५८ जना यात्रु नेपाल लैजाने योजना बनाएकोमा त्यसको आधा मात्र यात्रु नेपाल गएका छन् । यद्यपि दुताबास तथा गैरआवासीय नेपाली संघ युकेले नेपाल जान चाहनेहरुको नामावली संकलन गर्दा करिब ४५० जनाले इच्छा जाहेर गरेका थिए ।
आज नेपाल प्रस्थान गर्ने नेपालीहरुलाई बिदाइका लागि लण्डन ग्याटविक एयरपोर्टमा दुताबासका उपनियोग प्रमुख शरदराज आरन र तृतीय सचिव तेजेन्द्र रेग्मी, गैरआवासीय नेपाली संघ युकेका अध्यक्ष पुनम गुरुङ र महासचिव फडिन्द्र भट्टराई लगायत पुगेका थिए ।
सामान्यत चार्टर्ड उडानमा ८० प्रतिशत अकुपेन्सी हुनुपर्ने भए पनि करिब ५० प्रतिशतमै उडान भर्न जजिरा एयरलाइन्स राजी भएको छ । साथै अकुपेन्सी कम भएका कारण यात्रुहरुले टिकटका लागि बढी पैसा पनि तिर्नु परेन ।
