कोरोना बारे बैठकमा भाग लिन डेनिस प्रधानमन्त्रीले गरिन् आफ्नो विवाह स्थगन

तस्वीर घेट्टी इमेज

एजेन्सी ।  डेनमार्ककी प्रधानमन्त्री मेट फ्रेडेरिक्सनले कोरोना भाइरसका बारेमा हुने बैठकमा भाग लिनका लागि आफ्नो विवाह नै स्थगित गरेकी छिन् ।

उनले बिहीबार इन्स्ट्याग्राममा अर्को महिना हुने युरोपियन काउन्सिल बैठकमा भाग लिन आफ्नो पूर्वघोषित विवाह स्थगित गरेको सूचना प्रेषित गरेकी हुन् ।

कोरोनाभाइरसको महामारीपछि पहिलोपटक युरोप क्षेत्रका राष्ट्र प्रमुखहरुको बैठक जुलाई १७ मा हुँदैछ । सो बैठकमा कोरोनापश्चात युरोपेली मुलुकहरु कसरी अगाडि बढ्ने भन्ने लगायतका विषयमा छलफल हुँदैछ ।

‘म उनीसित विवाह गर्ने प्रतीक्षामा थिएँ’ आफ्ना मंगेतर बो टेनबर्गलाई संकेत गर्दै उनले भनेकी छिन् । ‘तर हामीले योजना गरेको जुलाईको शनिबारकै दिन युरोपियन काउन्सिलको बैठक ब्रसेल्समा हुँदैछ । मैले मेरो जिम्मा पूरा गर्नैपर्छ र डेनमार्कको स्वार्थ रक्षा गर्नैपर्छ’ ।

डेनमार्कमा कोभिड १९ बाट १२ हजार ८३६ संक्रमित भएका थिए भने ६०३ जनाको निधन भएको थियो ।

फ्रेडेरिक्सन डेनमार्कको प्रधानमन्त्रीमा गतवर्ष निर्वाचित भएकी थिइन् । ४१ वर्षीय उनी डेनमार्कको इतिहासमा कम उमेरकी प्रधानमन्त्री हुन् । यसअघि पनि उनले दुईपटक आफ्नो विवाह स्थगित गरिसकेकी छिन् ।