आइतबार, साउन २५ २०७७ | Sun, August 09, 2020
नेपालको समय: १०:२० | UK Time: 05:35

बेलायतमा ‘आमा’ प्रदर्शन स्थगित

वीनेपाली
२०७६ चैत १ गते २१:२७

लन्डन । बेलायतका केही शहरमा प्रदर्शन तय भएको ‘आमा’ फिल्मका सबै शो स्थगित भएको छ । कोरोना भाइरसका कारण यूकेसहित विश्व नै आक्रान्त बनिरहंदा आयोजकले शो स्थगित गरेका हुन् ।

‘हामीलाई थाहा छ सयौं दर्शक आमा हेर्न व्यग्र प्रतिक्षामा हुनुहुन्थ्यो तर अहिलेको विषम परिस्थितिमा यो सम्भव भएन’, बेलायतमा ‘आमा’ प्रदर्शनको अधिकार लिएका सञ्चारकर्मी कुशल श्रेष्ठले भने । श्रेष्ठले मनोरन्जन भन्दा जनस्वास्थ्य महत्वपूर्ण भएकाले शो स्थगित गरिएको जनाउंदै परिस्थिति अनुकुल भएपछि देखाइने जानकारी दिए । उनले ‘आमा’ एकपटक हेर्नै पर्ने चलचित्र बनेको पनि बताए ।

कोरोना भाइरस महामारीका कारण बेलायतमा शनिबारसम्म २१ जनाको निधन भइसकेको छ भने करिब ११४० जना संक्रमित भएका छन् ।

‘आमा’ यही २२ मार्च अपरान्ह एम्पायर हल अल्डरसट र २९ मार्च सांझ साउथ हयारोस्थित हयारो बरो फुटबल क्लबमा प्रदर्शन गर्ने तय भएको थियो । लन्डन साउथ इष्ट र बेलायतका अन्य केही शहरमा पनि प्रदर्शनको तयारी हुंदै थियो ।

‘आमा’ नेपालमा अत्यधिक हिट चलचित्र हो जसमा मिथिला शर्मा, सुरक्षा पन्त, सरिता गिरी, मनिष निरौला आदि कलाकारहरुको प्रमुख भूमिका छ । उक्त फिल्म ‘पशुपतिप्रसाद’ र ‘धनपति’ जस्ता उत्कृष्ट फिल्म बनाएर चर्चा बटुलेका निर्देशक दीपेन्द्र के खनालले निर्देशन गरेका हुन् ।

प्रतिक्रिया

सम्बन्धित सामाग्री

फेसबुक