गन्तब्यहीन यात्रा

यो विवश मनको यात्रा

यो थकित शरीरको यात्रा

यात्रा हजारौं माइलको तर गन्तब्यहीन यात्रा

यात्री धेरै भेटिए यो यात्रामा

तर तिमी किन यति पृथक?

सम्बोधनमा हजुरबाट तपाईं

तपाईंबाट तिमीसम्मको यात्रा

के यो यात्रा 

त्यो यात्रा हो ?

जो मेरो मनको ‘बकेट लिस्ट’ मा लेखिएको यात्रा

कि 

मेरो र तिम्रो अन्तरमनले कोरियोग्राफ गरेको यात्रा?

उफ,

त्यो अप्ठयारो तरिकाले सम्बोधन गरेको यात्रा

त्यो शब्दपिच्छै मायालु सम्बोधनसम्मको यात्रा

भलै मन विवश होला

अनि शरीर क्लान्त

यो यात्रा विवश छैन

यो यात्रा जीवन्त छ

त्यो फोनमा बारम्बार नजर जाने यात्रा

त्यो पर्खाईमा भुतुक्कै हुने यात्रा

मेसेज पढ्दै मुसुक्क हाँस्नुसम्मको यात्रा

यात्रा सुन्दर छ

त्यो टेक्स्ट मेसेजबाट दुई मिनेट 

अनि दुई मिनेटबाट घन्टौ भ्वाईस च्याटको यात्रा

त्यो एक अर्कालाई बुझेको यात्रा

प्रेममा चुर्लम्म डुब्नुसम्मको यात्रा

यात्रा रोमान्चक छ

यात्रा रोमान्चक छ

किनकी सहयात्री तिमी र म 

बेसर्तको बेलगाम यात्रा

प्रश्नविहीन अनुत्तरित यात्रा

मेरो र तिम्रो अनि हाम्रो सम्बन्धको यात्रा

हाम्रो गन्तब्यहीन यात्रा

सप्रेम, लण्डन

16/1/2020