एनआरएनए यूके निर्वाचन : एजेण्डा भन्दा आफ्नै प्रशंसा

NRNA UK logo

लन्डन । गैरआवासीय नेपाली संघ (एनआरएनए) बेलायतको यही १४ सेप्टेम्बर आसन्न निर्वाचनमा मिडिया प्रचारबाजी ह्वात्तै बढेको छ । निर्वाचनका प्रत्यासीहरु चुनावको मिति नजिकिदै जाँदा आ-आफ्ना प्रचार सामाग्रीसहित मिडियामा छाएका हुन् ।

नेपाली समुदायवीच लोकप्रिय मिडियामा छाउन एनआरएनए यूके अध्यक्षका उम्मेदवारहरुदेखि सदस्यसम्म मरिहत्ते गरिरहेका छन् । 

हाल मिडियामा छाउनेहरुले आफ्ना चुनावी एजेण्डा भन्दा जन्मस्थल, राम्रा गाडी खरिद र राम्रो व्यापार गरेको सस्तो प्रचारमा प्राय व्यस्त देखिन्छन् । कतिपय उम्मेदवारले व्यवसाय गर्नु र संस्थामा सल्लाहकार हुनुलाई नै पहिलो उपलब्धि मानेका छन् । एजेण्डा भन्दा पनि पत्रकारसँग व्यक्तिगत सम्बन्धका आधारमा एउटै सामग्री सबै मिडियामा छपाउने उम्मेदवारहरु एनआरएनए यूकेमा बढी देखिन थालेका छन् । जसका कारण मिडियाहरु सूचना मूलकभन्दा पनि प्रचार सामग्रीका रुपमा देखा पर्न थाल्नु चिन्ताको बिषय हो ।

पत्रकारले पनि एनआरएनए यूके हाँक्न कस्ता कस्ता ब्यक्तिले उम्मेदवारी दिएका छन् त्यस्ता बिषयमा लेख्न खोज्नुको सट्टा निकट उम्मेदवारको बिषयमा बढाईचढाई हैसियत भन्दा धेरै लेख्नमा समय खर्चिएका छन् । यसलाई हामी पत्रकारले पनि सच्याउनै पर्छ ।

निर्वाचन नजिकिदै गर्दा केही उम्मेवारले आफ्नो प्रशंसा गर्दै ‘रोलमोडल’ का रुपमा उभ्याएका छन् । विगतको लज्जाजनक हारलाई चटक्कै विर्सेर नेपाली सोसाइटी नै मेरो नियन्त्रणमा छ भन्ने भ्रम सिर्जना गरिरहेका छन् उनीहरु । मिडियामा छाएका मात्र हुन् कि नेपाली समुदायमै उनीहरुको राम्रो हैसियत छ, त्यो थाहा पाउन १४ सेप्टेम्बर कुर्नैपर्छ ।

एकथरी, समाजमा आफ्नो प्रभाव रहेको भ्रम छर्दै चलखेलमा व्यस्त छन् । सीमित संख्यामा रहेका नेपाली समुदायमा जनमतबाट आफूलाई स्थापित गर्न जीवनकालमा असफल रहेका मध्ये केहीले अब ‘फलानोलाई मैले जिताउँछु’ भन्दै चिया पसलमा गफ दिन थालेका छन् । जीन्दगीभर अर्काको पछि दगुर्ने र दुई चार पैसा आम्दानी गर्नमै व्यस्त मध्येका केही त्यस्ता व्यक्तिहरुलाई बर्षभरि नै निर्वाचन चाहिएको छ । जस्ले दैनिक जीवनका आवश्यकता पूरा गर्न सहयोग होस् ।

अर्कागरी, निर्वाचनमार्फत विदेशस्थित नेपाली समुदायमा प्रभाव देखाउने र अर्काकै पछि लागेर पदको टिका लगाउने अनुहारहरु यसलाई उपयोग गर्न चाहन्छन् । यस्ता कार्यबाट पत्रकारले आफूलाई जोगाई सत्य तथ्य समाचार सप्रेषण गर्नुपर्छ । नत्र, मिडिया एउटा प्रयोगको साधन बन्ने खतरा रहन्छ ।

प्रतिक्रिया

सम्बन्धित सामाग्री