बेलायत निवासी साहित्यकार माया गुरुङको मुक्तकसंग्रह ‘यात्रा’ लोकार्पण

लन्डन । बेलायत निवासी साहित्यकार माया गुरुङको मुक्तकसंग्रह ‘यात्रा’ लोकार्पण गरिएको छ ।

अन्तर्राष्ट्रिय नेपाली साहित्य समाज, युके शाखाको आयोजनामा शनिबार ९ अगस्ट २०२५ का दिन प्लमस्टिडस्थित स्पाइस आइल्यान्डमा आयोजित कार्यक्रममा यात्रा कृतिको सार्वजनिक गरिएको हो । कार्यक्रमका प्रमुख अतिथि बेलायतका लागि नेपाली राजदूत चन्द्रप्रसाद घिमिरे, अन्तर्राष्ट्रिय नेपाली साहित्य समाज, युके शाखाका अध्यक्ष राज श्रेष्ठ, साहित्यकार माया गुरुङ, साहित्यकार विजय हितानलगायतले यात्रा मुक्तकसंग्रह विमोचन गर्नुभएको हो ।

मायाले पहिलो कृति २०७८ मा जिन्दगी कवितासङ्ग्रह प्रकाशन गर्नुभएको थियो । लगत्तै अर्को वर्ष २०७९ मा ‘बाको जुत्ता’ र ‘ऐना’ एकैपटक लोकार्पण गर्नुभएको थियो । नेपालको स्याङ्जा (होमस्टे गाउँ) सिरुबारी पञ्चमूलमा जन्मनुभएकी साहित्यकार मायाको हाल वेलिङ्, केन्ट, बेलायतमा बस्दै आउनुभएको छ । उहाँले सन् ९० को दशकदेखि फुट्कर कविताहरू विभिन्न पत्रपत्रिकाहरूमा प्रकाशन गर्दै आउनुभएको हो ।

स्कुल शिक्षिका, आर्मी स्वास्थ्यसेवामा सहायक नर्स, एकाउन्ट फार्ममा सेवा गर्नुभएकी उहाँले राधा फाउन्डेसन नेपालद्वारा नारी रजस्वलासम्बन्धी अन्तर्राष्ट्रिय कविता प्रतियोगितामा दोस्रो पुरस्कार प्राप्त गर्नुभयो । अनेसास बेलायतबाट पुरस्कृत गरिने सुप्रमा–ईप्रमा साहित्यिक पुरस्कारबाट पहिलो कृति जिन्दगी कवितासङ्ग्रहका लागि पुरस्कृत बन्नुभयो । कविता वाचन र अन्य कविता प्रतियोगिताहरूमा पनि सम्मान र पुरस्कारहरू प्राप्त गर्नुभएको छ । कवयित्री गुरुङलाई अन्तर्राष्ट्रिय नेपाली साहित्य समाजले नवरत्न पुरस्कारबाट पनि पुरस्कृत गरेको छ ।

कार्यक्रममा सुप्रमा-ईप्रमा अन्तर्राष्ट्रिय पुरस्कार श्रीधर खनालको उपन्यास सावर्णिलाई प्रदान गरिएको छ ।