प्रधानमन्त्री मेको बहिर्गमनपछि ब्रेक्जिट संकट अरु गहिरिन सक्ने चेतावनी

1. 

लन्डन – आफ्नै मन्त्रिपरिषद्का सदस्यहरु तथा सत्तारुढ दलका सांसदहरुको विरोध पछि ब्रिटिश प्रधानमन्त्री टेरेसा  मेले आउँदो महिना पदत्याग गर्ने घोषणा गरेकी छिन् ।

शुक्रबार बिहान मध्य लन्डनस्थित आफ्नो कार्यालय,  टेन डाउनिंग स्ट्रीट, बाहिर बोल्दै श्रीमती मेले जुन ७ तारिखका दिन आफुले सत्तारुढ दलको नेताको पद त्याग्ने जनाइन् । त्यसपछि उनको दलले नया नेता चुन्नेछ र उनीनै ब्रिटेनका नया प्रधानमन्त्री हुनेछन् ।

आफ्नो वक्तव्यमा मेले सन् २०१६ मा ब्रिटेनमा भएको जनमत संग्रहको नतिजा अनुसार ब्रिटेनलाई युरोपबाट बाहिर लान नसकेकोमा खेद व्यक्त गरिन् । ब्रिटेनको दोश्रो महिला प्रधानमन्त्री हुन पाउनु आफ्नो सौभाग्य भएको भन्दै उनले आफुले माया गरेको मुलुकको सेवा गर्न पाउंदा कृतज्ञ भएको बताइन् । यसो भनिरहंदा उनका आँखामा आँशु आएको थियो ।

सन् २०१६ मा गराइएको जनमत संग्रहमा ब्रिटिश मतदाताले सानो अन्तरले ब्रिटेनले युरोपेली संघ छाड्नु पर्ने पक्षमा मतदान गरेपछि तत्कालिन प्रधानमन्त्री डेभिड क्यमरनले आफ्नो पदबाट राजिनामा दिएका थिए ।

त्यसपछि जुलाई २०१६ मा प्रधानमन्त्री चुनिएकी मेले तीन वर्ष नपुग्दै पद छाड्नुपर्यो । तर, नयाँ प्रधानमन्त्री नचुनिंदासम्म उनी कार्यवाहक प्रधानमन्त्रीको रुपमा रही रहनेछिन् ।

गत वर्ष उनको सरकारले युरोपेली संघसंग गरेको ‘फ्रेमवर्क सम्झौता’ ब्रिटेनको संसदले तीन पटक अस्वीकार गरिदिए पछि उनी माथि पद छाड्न दबाब बढेको थियो । तर, उनले मुख्य विपक्षी लेबर पार्टीसंग सम्झौता पारित गराउनेबारे छलफल शुरु गरेकी थिइन् तर ती वार्ता पनि फलदायी भएनन् ।

एक ट्वीट गर्दै लेबर पार्टीका नेता जेरेमी कोर्बिनले राजीनामा गरेर श्रीमती मेले सही निर्णय लिएको जनाए तर उनले नयां प्रधानमन्त्रीले देशमा ताजा चुनाव गराउनु पर्ने माग पनि गरे ।

ब्रिटेनले गएको मार्च २९ मा इयु छाड्नु पर्ने थियो, तर सांसदहरुले प्रधानमन्त्रीले संसदमा प्रश्तुत गरेको सम्झौता अस्वीकार गरिदिएपछि अब ३१ अक्टोबर भित्र इयु छाड्ने गरि नयां मिति तोकिएको छ ।

यसै महिना भएको स्थानीय चुनावमा सत्तारुढ कन्जरभेटिभ पार्टीले १,३३४ काउन्सीलर पदहरु गुमाएको थियो भने लेबर पार्टीले ८२ स्थान गुमाएको थियो । तेश्रो ठूलो दल लिबरल डेमोक्र्याटहरुले ७०३ स्थान थप गरेका थियो । त्यस्तै ग्रीन र स्वतन्त्र उम्मेदबारहरुले पनि स्थान बढाएका थिए ।

प्रधानमन्त्रीले ब्रेक्जिटबारे समय मै निर्णय लिन नसकेकाले चुनावमा त्यस्तो नतिजा आएको बताएकी थिईन् । विश्लेषकहरुले प्रधानमन्त्री मेको बहिर्गमन पछि ब्रेक्जिट संकट अरु गहिरिन सक्ने चेतावनी दिएका छन् ।

सत्तारुढ दलका नयां नेता तथा आगामी प्रधानमन्त्रीले युरोपेली संघसंग नयाँ सहमति कायम गर्न नसकेमा ब्रिटेनमा फेरि आमचुनाव हुनसक्ने अनुमान गरिएको छ ।