लन्डन । बेलायती नेपाली डायस्पोराको सबैभन्दा वृहत इभेन्ट गोर्खा कप फुटबल प्रतियोगितामा यस पटक ४२ टिमबीच भिडन्त हुने भएको छ । आउंदो आइतबार अल्डरसटस्थित क्वीन्स एभिन्यू खेल मैदानमा हुने १७ औं प्रतियोगितामा ३२ मेन र १० भेट्रान टिमबीच प्रतिष्पर्धा हुने आयोजक तमुधिं यूकेले आईतवार पत्रकार सम्मेलन गरि जनाएको हो ।
प्रतियोगिता हेर्न करिब १० हजार दर्शक सहभागी हुने अपेक्षा आयोजकको छ । प्रतिष्पर्धाका लागि हल्याण्ड, आइसल्याण्ड, बेल्जियम, आयरल्याण्ड र हङकङबाट समेत टिमले सहभागिता जनाउने भएका छन् ।
करिब ६५ लाख रुपैयां खर्च हुने अनुमान गरिएको उक्त प्रतियोगितामा प्रथम हुने टिमले २५ सय पाउण्ड नगद, ट्रफी र प्रमाणपत्र पाउनेछन् । टप स्कोरर, वेष्ट प्लेयरका लागि पनि पुरस्कारको विशेष व्यवस्था छ ।
तमुधिं यूके अध्यक्ष नन्दजंग गुरुङले गोर्खा कप नेपाली समुदायबीच एकताको सन्देश दिने एउटा मुख्य इभेन्ट भएको बताए । उनले आयोजक तमुधिं यूके भएपनि इभेन्ट सबै नेपालीको साझा भएको बताउंदै यसले नेपाली युवा खेलाडीलाई अवसर प्रदान साथै नेपाली कला, संस्कृति, खाना, भेषभुषाको समेत प्रवर्धन गर्ने जनाए ।
गोर्खा कप हेर्न बेलायतभरबाट नेपाली ओइरिन्छन् । कतिपयले यसलाई डेटिङ स्पटका रुपमा समेत व्याख्या गर्ने गरेका छन् । स्थानीय रसमोर बरो काउन्सिलले उक्त इभेन्टलाई आफ्नो वार्षिक क्यालेन्डरमै राखेको छ । खाना तथा हस्तकलाका स्टल, एफए कप डिस्प्ले, प्यारा डिस्प्ले, राफल ड्र, सांस्कृतिक प्रस्तुति कार्यक्रमका थप आकर्षण हुन् । ४२ हस्तकला र १० खानाको स्टल रहने आयोजकले जनाएका छन् । निशुल्क स्वास्थ शिविर समेत हुनेछ । टिकेटमा एक तोला सुनको पुरस्कार छ ।
कार्यक्रम संयोजक क्याप्टेन पिताम्बर गुरुङले खेलमा स्वास्थ्य तथा सुरक्षालाई विशेष प्राथमिकता दिइएको जानकारी दिए । स्थानीय प्रहरी, सुरक्षा गार्ड र स्वयंसेवक गरि करिब एकसय जनाले खेल स्थानलाई सुरक्षा दिने छन् ।
उक्त अवसरमा टिम र खाना स्टलको ‘ड्र’ गरिएको थियो । उपाध्यक्ष हितकाजी गुरुङले तमुधिं यूकेले गरेपनि गोर्खा कप बेलायतबासी सबै नेपालीको साझा कार्यक्रम रहेको भन्दै सफल पार्न आव्हान गरे ।
पत्रकार सम्मेलनमा तमुधिं यूकेका संस्थापक अध्यक्ष मिनप्रसाद गुरुङ, पूर्व अध्यक्षहरु ज्ञाम गुरुङ, रामचन्द्र (सुर्जे) गुरुङ र कमल गुरुङ, सहारा युके अध्यक्ष कुमार गुरुङसहित कार्यसमितिका पदाधिकारी, सल्लाहकार तथा सदस्यहरुको उपस्थिति थियो ।
तस्बिर- शिव भण्डारी
