लन्डन । बरो अफ बार्नेटबाट निर्वाचित काउन्सिलरद्वय लक्ष्य गुरुङ तथा अम्मर नकबीले बर्न्टओकमा सन्चालित नेपाली कक्षाको अवलोकन गरेका छन् ।
यही आइतबार बर्न्टओकस्थित वाटलिङ कम्युनिटी सेन्टरमा नेपाली भाषा तथा सांस्कृतिक केन्द्रद्वारा गएको दुई वर्षदेखि सन्चालित नेपाली कक्षाको अवलोकन पछि बोल्दै बार्नेटको हेल वार्डबाट निर्वाचित काउन्सिलर लक्ष्य गुरुङले सन् २००८ देखि नै नेपाली बालबालिकाहरुकालागि नेपाली कक्षा सन्चालन गर्न आफूले पहल गर्दै आएको बताए । उनले प्रवासमा रहेको नयाँ पुस्तालाई नेपालसंग जोडन र आफ्नो संस्कृति चिनाउन पनि नेपाली कक्षा उपयोगी भएको बताए ।
बार्नेटको बर्न्टओकस वार्डबाट निर्वाचित काउन्सिलर अम्मर नकबीले आफू आफ्ना बाबाआमासंग पाँच वर्षको उमेरमा बेलायत आएको र आफ्नो मातृभाषा उर्दु बाहेक हिन्दी र पन्जाबी पनि बोल्न सक्ने बताए । उनले नेपाली सिकीरहेका नानीहरु भाग्यमानी हुन् भन्दै आफ्नो मातृभाषामा बोल्न र सिक्न पाएका बालबालिकाहरुले पछि ठूलो भएपछि अहिले सिकेको भाषाको महत्व बुझ्ने र त्यसकालागि धन्यवाद दिने विश्वास व्यक्त गरे । उनले नेपाली कक्षा सन्चालनका लागि के सहयोग गर्न सकिन्छ भनेर आफूले बार्नेट काउन्सिलमा छलफल गर्ने पनि बताए ।
पाहुनाहरुलाई स्वागत गर्दै नेपाली भाषा तथा सांस्कृतिक केन्द्रका अध्यक्ष सुमन प्रधानले नेपाली बालबालिकाहरुले नेपालको भाषा, संस्कृति र सम्पदाबारे जानकारी गराउने उद्देश्यले स्वयम्सेवीरुपमा नेपाली कक्षा शुरु गरिएको जानकारी दिए । उनले हरेक शनिबार सन्चालन हुने कक्षामा आधा घन्टा योग तथा ध्यान, आधा घन्टा संगीत र एक घन्टा नेपाली भाषा सिकाइने गरेको बताए । हाल नेपाली कक्षामा ठूला तथा साना नानीहरुलाई दुई समूहमा बाँडी पठनपाठन भैरहेको र केन्द्रले एक दक्ष शिक्षिकाको पनि व्यवस्था मिलाएको उनले जानकारी दिए ।
सो अवसरमा बोल्दै नेपाली कक्षामा पढीरहेकी छात्रा स्वस्ति योगीले नेपाली भाषा लेख्न, पढन र बोल्न सिक्न पाउँदा आफू र आफ्ना साथीहरु निकै खुसी भएको बताइन् । ‘यहाँ हामीले भाषा मात्रै हैन, योग ध्यान, गीत र संगीत पनि सिक्छौ, नेपालका चाडबाडहरुबारे पनि जान्ने मौका पाउँछौ, कविता र वादविवाद प्रतियोगितामा पनि भाग लिन्छौं’- स्थानीय किङ्सबरी स्कुलमा कक्षा आठमा अध्ययनरत स्वस्तिले भनिन् ।
नेपाली भाषा कक्षाका संगीत संयोजक उमेश खड्काको निर्देशनमा बालबालिकाहरुले ‘फूलको आँखामा फूलै संसार’ भन्ने लोकप्रिय गीत गाएर सुनाएका थिए । कार्यक्रममा बर्न्टओक नेपाली समाजका महासचिव भोला पनेरुले धन्यवाद दिएका थिए भने समाजका मिडिया संयोजक भगीरथ योगीले कार्यक्रम सन्चालन गरेका थिए ।
सो समारोहमा बर्न्टओक नेपाली समाजका अध्यक्ष उदय गुरुङ, उपाध्यक्ष बिष्णु गुरुङ, अन्य पदाधिकारीहरु तथा अभिभावकहरुको पनि उपस्थिति थियो । काउन्सिलर नकबी सोही दिन बसेको बर्न्टओक नेपाली समाज कार्यसमितिको बैठकमा पनि केहीबेर पर्यवेक्षकको रुपमा सहभागी भएका थिए ।
यसैबीच नेपाली कक्षाका एकजना छात्र अनिमेष सिलवाल सर्रीमा आइतबार आयोजित पहिलो नेपाली बालसाहित्य गोष्ठीमा सहभागी भएका छन् । नेपाली साहित्य विकास परिषद् युके र सयपत्री नेपाली साँस्कृतिक समूह युकेले संयुक्तरुपमा आयोजना गरेको गोष्ठीमा अनिमेषले ‘आमाको अर्ती’ नामक कविता सुनाए ।
