हराइरहेका भूतपूर्व गोर्खा राई मृत भेटिए

लण्डन । गत २१ सेप्टेम्बरबाट हराइरहेका भूतपूर्व गोर्खा हेम कुमार राई मृत भेटिएका छन् । ५१ वर्षीय राईको मृत शरीर लेस्टर ग्रोबीमा भेटिएको लेस्टरसायर पुलिसले शुक्रबार साँझ जनाएको छ ।

पुलिसले राईको निधन शंकास्पद नभएको जनाउँदै कोरोनरका लागि तयारी भइरहेको उल्लेख गरेको छ ।   

लेस्टरसायर पुलिसले राईको खोजी कार्यमा सघाउने सबैप्रति आभार समेत ब्यक्त गरेको छ ।  

केही वर्ष यता ननिटन बस्दै आएका राई गत २१ सेप्टेम्बरमा अन्तिम पटक देखिएका थिए । २४ सेप्टेम्बरका दिनसम्म आफन्त र परिवारजनसंग सम्पर्कमा रहेपश्चात अकस्मात ग्रोभीबाट काममा समेत नगइ सम्पर्कविहीन भएको स्थानीय नेपालीले जनाएका छन् ।

करिब ५ फिट ५ इन्च उचाइ भएका आर्मी नम्बर २११६७२१७ का एक्स कर्पोरल राई १० जिआर (२ आर जिआर) मा सेवारत भइ अवकास लिएका थिए ।

आफ्ना सक्रिय सदस्य गुमाउनु परेकोमा इन्टेक ८५ का अध्यक्ष योगकुमार फगामीले दु:ख ब्यक्त गरेका छन् । फगामीले नम्बरीको मृत आत्माको चिर शान्तिको कामना गर्दै श्रद्धाञ्जली समेत अर्पण गरेका छन् । राईको निधनमा ननिटन नेपाली समुदाय पनि दुःखी छ ।