काठमाडौंमा देउवा विरोधी कांग्रेसीहरुको जमघट, महामन्त्री सशांकलाई बोलाइएन

कांग्रेस नेता पौडेल

काठमाडौँ- नेपाली कांग्रेसका सभापति शेरबहादुर देउवा विरुद्ध रहेको कांग्रेसको अर्को समूहले राजधानीमा भेला गरेको छ । नेता रामचन्द्र पौडेलले नेतृत्व गरेको संस्थापन विपक्षमा रहेको यो समूहबाटै महामन्त्रीमा निर्वाचित भएका महामन्त्री संशाक कोइराला भने भेलामा देखिएनन् ।

नेपाल विद्यार्थी संघ काठमाडौँको ब्यानरमा सोमबार भएको ‘अबको काँग्रेस र युवा विद्यार्थीको भूमिका’ विषयक विचार गोष्ठी भनिएको उक्त भेलामा कोइराला परिवारका अर्का प्रभावशाली नेता शेखर कोइराला पनि अनुपस्थित थिए । भेलामा नेता पौडेलसँगै, प्रकाशमान सिंह, अर्जुननरसिंह केसी, कृष्ण सिटौला, गगन थापा र प्रदीप पौडेललगायतका नेताहरू उपस्थित थिए ।

भेलालाई सम्बोधन गर्दै वरिष्ठ नेता पौडेलले पार्टी सभापतिले सबै कांग्रेसीलाई समेटेर अगाडि लैजान नसक्दा पार्टी अप्ठ्यारोमा परेको बताए । उनले भने, “१३ औँ महाधिवेशनको परिणाम अहिले भोगिरहेका छौँ ।” वरिष्ठ नेता पौडेलले सरकारले दुईतिहाईको समर्थन जुटाउनु र सत्ता पक्षबाटै प्रत्यक्ष कार्यकारी राष्ट्रपतिको कुरा गर्नुले गम्भीर आशंका पैदा गरेको बताए ।

“सत्तारुढ दल पैसाको खोल ओढेर कांग्रेस सिध्याउने खेलमा लागेका छन्, काँग्रेसलाई घेराबन्दी पार्ने खेल भइरहेको छ, कांग्रेस समयमै सचेत हुनु जरुरी छ,” उनले भने ।

पार्टीका पूर्वमहामन्त्री प्रकाशमान सिंहले विधि विधान उल्लंघन गरेर पार्टी चल्न नसक्ने बताए । “पार्टी नै विधानअनुसार चल्न नसक्दा भ्रातृ संस्था लथालिंग अवस्थामा पुगेको छ,”  उनले भने ।

पार्टी पूर्वमहामन्त्री कृष्णप्रसाद सिटौलाले सामन्तवाद र चाकडीबाज संस्कारले कांग्रेस अगाडि बढ्न नसक्ने बताए । “सभापतिले ४० सांसद मनोनीत गर्दा मजदुर, बुद्धिजीवी, वकिल कसैलाई पनि नगर्नु दुःखद् कुरा हो, यस्तो तरिकाले कांग्रेस चल्न सक्दैन,”, उनले भने । पार्टीभित्र नीति, कार्यक्रम र सांगठनिक संरचना परिवर्तन आवश्यक भएको उनको भनाइ थियो ।

कांग्रेस केन्द्रीय सदस्य अर्जुननरसिंह केसीले कांग्रेसलाई पहिलो बनाउने दृढ संकल्प बनाएर अगाडि बढ्नु अहिलेको आवश्यकता भएको उल्लेख गरे । अर्का केन्द्रीय सदस्य नवीन्द्रराज जोशीले सबै जनतालाई समेटेर अगाडि बढे मात्र पार्टी सशक्त हुने बताए ।

युवा नेता तथा केन्द्रीय सदस्य गगनकुमार थापाले कांग्रेसलाई बलियो बनाउन स्थानीय, प्रदेश र केन्द्रीय निर्वाचनको मिति तय गरी जनतामाझ जानुपर्ने बेला आएको बताए । केन्द्रीय सदस्य प्रदीप पौडेलले नेतृत्व, सिद्धान्त, व्यवहार र आचरण सुधार गरे मात्र कांग्रेस सुध्रिने बताए ।

प्रतिक्रिया

सम्बन्धित सामाग्री