लन्डन । ब्रिटिश सांसदहरुले नेपाल भ्रमण गर्ने भएका छन् । ब्रिटिश संसदका सम्माननीय सांसदहरु तथा ब्रिटिश ग्रुप अन इन्टर पार्लियामेन्ट्री युनियनका सदस्य नाइजल इभान्सको नेतृत्वमा अन्य सांसद सदस्यहरु डेभिड मोरिस, केरी म्याकार्थी, बीरेन्द्र शर्मा, लर्ड बाल्फ डलिच, लर्ड ढोलाकिया र युनियनकी इन्टरन्यानशल प्रोजेक्ट म्यानेजर मिस इमिली डेभिज सम्मिलित एक उच्चस्तरीय प्रतिनिधिमण्डलले यही मे ६ देखि १२, मे २०१८ सम्म नेपालको भ्रमण गर्ने कार्यक्रम तय भएको हो ।
नेपाल भ्रमणको वखत उक्त प्रतिनिधिमण्डलले सम्माननीय राष्ट्रपति, प्रधानमन्त्री, सभामुख, राष्ट्रियसभाका अध्यक्ष, का.मु. प्रधान न्यायाधीश, परराष्ट्रमन्त्री, उर्जामन्त्री, महिला, बालबालिका र समाज कल्याणमन्त्री लगायत विशिष्ट व्यक्तिसंग शिष्टाचार भेटघाट गर्ने कार्यक्रम रहेको लन्डनस्थित नेपाली दूतावासले बुधबार अपरान्ह जनाएको छ ।
संयुक्त अधिराज्यका लागि नेपाली महामहिम राजदूत डा. दुर्गा बहादुर सुवेदीले बुधबार (मे २ का दिन) ब्रिटिश संसदका सम्माननीय सदस्य नाइजल इभान्स तथा प्रतिनिधि मण्डलका सांसदहरु श्रीमती केरी म्याकार्थी, लर्ड ढोलाकिया र युनियनकी इमिली डेभिससंग उहांको कार्यकक्षमा शिष्टाचार भेट गरी सम्माननीय सांसदहरुको नेपाल भ्रमणको तयारीबारे जानकारी गराउनुभयो ।
उक्त भेटमा राजदूत डा. सुवेदीले ब्रिटिश सांसदहरुको नेपाल भ्रमणले द्विपक्षीय सहयोग र सम्बन्धलाई अझ थप मजबुत बनाउन उल्लेखनीय भूमिका रहने कुरा व्यक्त गर्नुभयो ।
नेपालमा निर्वाचन सफलतापूर्वक सम्पन्न भई संविधान कार्यान्वयन भएको र निर्वाचित सरकारले आर्थिक विकासलाई मूल लक्ष्य निर्धारण गरेको वर्तमान परिप्रेक्ष्यमा बेलायती सांसदहरुको यो भ्रमण सार्थक र उत्प्रेरक हुने विश्वास व्यक्त गर्दै राजदूत डा. सुवेदीले दुई मुलुकका सांसदहरुबीचको सम्बन्धले लोकतान्त्रिक व्यवस्थाको सुदृढीकरणमा समेत मद्दत पुग्ने विश्वास व्यक्त गर्नुभयो ।
प्रतिनिधिमण्डलका नेता सम्माननीय इभान्सले तीन तहको निर्वाचन शान्तिपूर्वक र सफलतापूर्वक सम्पन्न भई नयां सरकार निर्माण भएका बेला नेपाल भ्रमण गर्न पाउनु सुखद संयोग रहेको बताउनुभयो ।
आफ्नो भ्रमणपश्चात नेपालको आर्थिक र सामाजिक विकासमा थप सहयोगका निम्ति ब्रिटिश सरकारलाई सिफारिश गर्ने बताउंदै इभान्सले दुई सय वर्षभन्दा पुरानो घनिष्ट सम्बन्ध रहेको नेपालसंग ब्रिटिश सरकार र जनताको सधैं सद्भाव र सहयोग रहने विश्वास समेत व्यक्त गर्नुभयो ।
