लन्डन । बेलायतमा स्थापित ‘सयपत्री नेपाली सांस्कृतिक समूह यूके’ मा नयां नेतृत्व चयन भएको छ । सप्ताहन्त सम्पन्न समूहको साधारणसभाले डम्बर सिंहको अध्यक्षतामा सर्वसम्मत नयां कार्यसमिति चयन गरेको हो । नयां कार्यसमितिको उपाध्यक्षहरुमा दीपक शाही र प्रभु गुरुङ, सचिव गौरव क्षेत्री, उपसचिव दीपक खड्का, कोषाध्यक्ष दीपक जिसी, सहकोषाध्यक्ष गिता केसी चयन भएका छन् ।

त्यसैगरि बोर्ड सदस्यहरुमा अविसा गुरुङ, अस्बिन शाही, डिबी सुनार र दिनेश अर्याल चयन भए ।

‘नेपाली कला संस्कृति नै राष्ट्रको पहिचान हो’ भन्ने मुल नारा बोकेर स्थापित उक्त समूहले बेलायतका अधिकांश स्टेज कार्यक्रममा नाचगानमार्फत नेपाली कला संस्कृति प्रस्तुत 
गर्दै आएको छ ।

नवनियुक्त अध्यक्ष सिंहले आफ्नो संस्था गैर राजनैतिक, गैर साम्प्रदायिक एक विशुद्ध सामाजिक संस्था भएको बताउंदै सबै नेपालीहरुको साझा घर भएको उल्लेख गरेका छन् ।

‘हामी विदेशमा केवल तन लिएर आएका छैनौं, नेपाली मन र नेपालीपन पनि लिएर आएका छौं’- अध्यक्ष सिंहले भने, ‘कर्मभूमि जहां भएपनि नेपाली मन र नेपालीपनमा जिउनु पर्छ र हाम्रो कला र संस्कृतिको जगेर्ना र सम्वर्धन गर्नुपर्छ । यो नै हाम्रो पहिचान हो । जसलाई सयपत्री नेपाली सांस्कृतिक समूह यूके ले आत्मसाथ गरेको छ ।’

समूहका संस्थापक अध्यक्ष एल बी गुरुङले नयां निर्वाचित कार्यसमितिलाई वधाइ तथा शुभकामना दिएका छन् ।