सपनले १७ वर्ष अघिको यस्तो दुर्लभ भिडियो भेटे

लन्डन । सन् २००० मा मिलेनियम सेलिब्रेसनको उल्लास थियो बेलायतभर । यही सुःखद अवसरमा केही पृथक काम गर्ने जोस चलेपछि बेलायतका परिचित गायक, साउण्ड इन्जिनियर तथा कार्यक्रम आयोजक सपनकुमार राईले ‘मिलेनियम सौगात’ नामक गीति एल्बम निकाले । म्यूजिक नेपालले उत्पादन गरेको थियो उक्त एल्बम । सोही एल्बममा समावेश भएको ‘यो मनले सधैंभरि तिमीलाई डाक्छ…’ को म्यूजिक भिडियो बनाए सपनले । 
संगीत थियो भूपेन्द्र रायमाझी र स्वर सपनकुमार राईको ।

त्यही ऐतिहासिक भिडियो अहिले युट्यूबमा भेटेपछि दंग छन् सपन । 
रयापर मास्टर जीको समेत स्वर रहेको उक्त भिडियो ऐतिहासिक मान्छन् सपन । ‘रिमिक्स गीतको चलन बलिउडले २ वर्षअघिमात्र शुरु गरेको थियो । अडियो रयाक नामक पाकिस्तानीको कम्पनीमार्फत मैले गीत गाउने मौका पाएको थिएं । त्यही सिलसिलामा एउटा राम्रो क्रियसन हुने रहेछ भनेर पहिलो रिमिक्स त्यो पनि कालो वर्णको रयापर राखेर बनाएं’, सपन स्मरण गर्छन् ।

त्यो बेला बेलायतमा नेपालीको जनसंख्या पातलो थियो । नेपाल टेलिभिजनबाट आएका प्राविधिकहरुले उक्त भिडियो बनाएको सपनले बताए । भिडियोमा सपन र जुली बस्नेतको अभिनय छ भने 
ट्राफलगर स्क्वायर, मार्गरेट, बिग बेन, फिन्चलीको क्लब आदि दृश्य समेटिएको छ ।

‘नेपालबाट आएर नेपाल टेलिभिजनका प्राविधिकले बनाएकाले पनि उक्त भिडियो दुई वर्ष सम्म लगातार नेपाल टेलिभिजनमा बजेको थियो । त्यही गीतले मलाई चिनायो’, सपन भन्छन्, ‘एकजना निग्रोको गायन र अभिनय समिश्रण अनि बेलायतको सिन भएर पनि धेरैले रुचाए ।’

हेर्नुहोस् त्यो बेलाको म्यूजिक भिडियो