बुधवारदेखि अवरुद्ध नारायणगढ–मुग्लिन सडकखण्ड सञ्चालनमा

muglin narayangadh

ठाउँ ठाउँमा पहिरो खसेर अवरुद्ध बनेको नारायणगढ–मुग्लिन सडकखण्डमा शुक्रबार अलपत्र परेका यात्रु । तस्बिर ः प्रदीपराज वन्त, रासस

चितवन, २० साउन । बुधवार साँझबाट अवरुद्ध बनेको नारायणगढ–मुग्लिन सडकखण्ड आज दिउँसो २ः१० बजेदेखि दुईतर्फी सञ्चालनमा आएको छ ।

उक्त सडकखण्डमा १० भन्दा बढी ठाउँमा पहिरो खसेपछि सडक अवरुद्ध बनेको थियो । नारायणगढ–मुग्लिन सडक आयोजनाका इञ्जिनियर शिव खनालका अनुसार पहिरोले बगाएको भालुढुंगाबाहेक अन्य ठाउँमा दुईतर्फी सडक सञ्चालनमा आएको हो ।

गएराति बगाएको भालुढुंगामा भने एकतर्फी सञ्चालनमा आएको खनालले बताउनुभयो । साँझसम्ममा सो ठाउँमा पनि दुईतर्फी सवारी सञ्चालनमा आउने उहाँले बताउनुभयो । आयोजनाका इन्जिनियर खनालका अनुसार नारायणगढबाट २७ किमीको दूरीमा रहेको भालुढुंगामा खोल्साले सडकको तीन मिटर क्षेत्र बगाएको थियो ।

सो ठाउँमा तलबाट ग्याबिन लगाएर बाटोको सतह मिलाउनका लागि काम भइरहेको उहाँले बताउनुभयो । सडकमा पहिरो पन्छाउन मुग्लिनतर्फ चार लोडर र दुई एक्साभेटर प्रयोग गरिएको थियो भने सिमलतालदेखि गाईघाटसम्म दुई लोडर र एक एक्साभेटरले पहिरो पन्छाइरहेका थिए ।

तीनदिनदेखि सडक अवरुद्ध भएपछि अलपत्र परेका यात्रु सडक सञ्चालनमा आएसँगै आ–आफ्नो गन्तव्यतर्फ लागेका छन् । सडकका संवेदनशील क्षेत्रमा पहिरोका बीचमा रहेका १२५ वटा सवारीसाधनलाई बिहीबार साँझ एकतर्फी सडक खोलेर गन्तव्यतर्फ पठाइएको थियो ।

अवरुद्ध महाकाली राजमार्ग पुनः सञ्चालनमा

बैतडी, २० साउन । गएराति परेको पानीले सडकमाथिबाट पहिरो खस्दा अवरुद्ध भएको महाकाली राजमार्ग आज दिउँसोदेखि पुनः सञ्चालनमा आएको छ ।

बैतडीको सतवाझदेखि–गोकुलेश्वर सडकखण्डअन्तर्गत डिलाशैनी–६ बांगाबगरमा पहिरो जाँदा यातायात अवरुद्ध बनेको सडक स्थानीय बासिन्दा, प्रहरी र डोजरको सहायताले पन्छाएपछि सडक पुनः सञ्चालनमा आएको जिल्ला प्रहरी कार्यालय बैतडीका प्रहरी नायब उपरीक्षक हेरम्ब शर्माले जानकारी दिनुभयो ।

बांगाबगरमा माथिबाट आएको पहिरोका कारण सडक अवरुद्ध हुँदा यातायात पूर्णरुपमा बन्द भएको थियो ।

सडक सञ्चालन भएपछि बैतडीबाट बाहिरिने र भित्रिने लामो तथा छोटो दूरीका यातायातका साधन गन्तव्यतिर लागेका छन् ।

सडक अवरुद्ध हुँदा काठमाडौँ, महेन्द्रनगर, धनगढी, डडेल्धुरा, दार्चुला, बैतडी सदरमुकामका लागि छुटेका तथा जिल्ला भित्रिन लागेका यात्रु अलपत्र परेका थिए । २०६० सालमा आएको ठूलो पहिरोको व्यवस्थापन तथा सडक मर्मत राम्रोसँग नहुँदा वर्षात्को समयमा प्रत्येक वर्ष उक्त ठाउँमा बेलाबेलामा सडक अवरुद्ध हुने गरेका छन् ।

सोहीबेलादेखि प्रत्येक वर्ष आउने पहिरोले हाल पनि बांगाबगरवासीलाई चिन्तित बनाएको छ । पहिरोले स्थानीय बासिन्दालाईसमेत त्रसित बनाएको छ । २०६० सालदेखि प्रत्येक वर्ष पहिरोले घरखेत बगाउन थालेपछि स्थानीयवासी त्रसित बनेका हुन् ।

विसं २०६० मा छ परिवार पहिरोका कारण पूर्णरुपमा विस्थापित भएका थिए भने पछिल्लो समयमा थप सात परिवार पनि पहिरोकै कारण विस्थापित भएका छन् । पहिरोले अहिले १५० रोपनी जमिनलाई बगरमा परिणत गरिसकेको छ । वर्षात्सँगै पहिरो खस्न थालेपछि बांगाबगरवासीलाई चिन्तित बनाएको स्थानीयवासी धनीराम सार्कीले बताउनुभयो ।

पहिरोको छेउमै टहरा हालेर बसेका दलित समुदायका सात परिवारलाई अहिले निकै चिन्तित बनाएको उहाँले बताउनुभयो । ओत लाग्नका लागि आफूहरुसँग जमिन नभएकाले पहिरोको छेउमै टहरा हालेर बस्न बाध्य भएका उहाँले बताउनुभयो । दुवैतर्फ गरेर अहिले ३० भन्दा बढी परिवार पहिरोका उच्च जोखिममा रहेका स्थानीयवासी तेजबहादुर साउदले बताउनुभयो ।

उता पहिरोका कारण गोकुलेश्वर–गन्ना सडक भने अवरुद्ध भएको छ । सो सडकखण्डअन्तर्गत रुद्रेश्वरको बगडीमा पहिरो खस्दा सडक अवरुद्ध भएको हो । सडकमाथिबाट पहिरो खस्ने क्रम नरोकिएकाले पहिरो पन्छाउन समस्या भएको जिल्ला प्रहरी कार्यालयले जनाएको छ ।

प्रतिक्रिया

सम्बन्धित सामाग्री