नेपाल इन्जिनियर्स एसोसिएसन यूके सम्पर्क केन्द्र स्थापना

लन्डन । नेपाल इन्जिनियर्स एसोसिएसनको यूके सम्पर्क केन्द्र स्थापना भएको छ । गत वर्ष डिसेम्बर ११, २०१६ का दिन लन्डनस्थित नेपाली इन्जिनियरहरुको प्रारम्भिक कमिटीले विधान अनुरुप एसोसिएसनसमक्ष यूके सम्पर्क केन्द्र खोल्न निवेदन दिएको थियो । रितपूर्वक दिइएको निवेदन स्वीकृत भए अनुसार केन्द्र खोलिएको जनाइएको छ । केन्द्रको औपचारिक उद्घाटन आगामी जुलाइ- अगष्टतिर एसोसिएसन केन्द्रका प्रतिनिधिबाट गर्ने निर्णय गरिएको छ ।

गत ८ अप्रिलका दिन नेपाली इन्जिनियरहरुको वृहत भेलाले इन्जिनियर तेजेन्द्र रोकामगरको अध्यक्षतामा ११ सदस्यीय समिति चयन गरेको छ । समितिको उपाध्यक्षमा उज्जवल ढकाल, महासचिव लोकराजसिंह, उपमहासचिव सुमन लामा र कोषाध्यक्ष उदिप राई चयन भएका छन् । त्यसैगरि, सदस्यहरुमा हेमन्त पाण्डे, ध्रुवराज शर्मा, सुरज राई, मनेन्द्र राई, रविन्द्र मोक्तान र अमृत थापा चुनिएका छन् ।

समितिले आगामी दिनमा यूकेमा रहेका सम्पूर्ण नेपाली इन्जिनियरहरुबीच सम्पर्क थलोका रुपमा केन्द्रलाई विकसित गर्दै लगिने बताएको छ । साथै नेपाल र यूकेमा रहेका सम्पूर्ण नेपाली इन्जिनियरबीच प्रविधि र सीप आदानप्रदान गर्ने, निरन्तर छलफल गर्ने, यूकेमा रहेका नेपाली इन्जिनियरहरुलाई एसोसिएसनको एउटै छातामुनी ल्याउन पहल गर्ने आदि योजना सारेको छ । भेलाले सम्पर्क केन्द्र खोल्न स्वीकृत दिएकामा नेपाल इन्जिनियर्स एसोसिएसनलाई धन्यवाद समेत दिएको छ ।

नेपाल इन्जिनियर्स एसोसिएसन नेपाल सम्पूर्ण इन्जिनियरहरुको साझा संस्थाका रुपमा सन् १९६२ देखि स्थापना भइ निरन्तर रुपमा नेपाली इन्जिनियरहरुको प्रविधि विकास र हकहितका लागि कार्यरत छ ।