तस्विरः एभरेष्ट गौतम
लन्डन । मार्च पहिलो सातादेखि बेलायतका केही शहरमा नेपाली नाटक देखाइने भएको छ । सनमकुमार बैरागद्वारा लिखित तथा निर्देशित नाटक जीगिषा (जित्ने इच्छा) प्रदर्शन गर्न लागिएको हो । शनिबार लन्डन नर्थफिल्डस्थित काठमाण्डौं कुजिन रेष्टुरेन्टमा आयोजित पत्रकार सम्मेलनमा निर्देशक तथा लेखक बैरागले उक्त नाटक आगामी ४ र ५ मार्चमा हयारो बरो फुटबल क्लब साउथ हयारो, ११ मार्चमा उलवीच ट्रामसेड थिएटर, १२ मार्चमा दि प्यालेस अल्डरसट र २७ मार्चमा एडिनबराको एसेमब्ली रोक्सी थिएटरमा देखाउन लागिएको जानकारी दिए ।
फस्ट एजुकेट नेपाल यूके (फेन) को यो नाटक दोश्रो प्रस्तुति हो । यसअघि फेनले गरेको ‘समय दृश्य’ को शो सफल मानिएको थियो ।
पत्रकार सम्मेलनमा निर्मातामध्ये एक तेन्जी लामा पाख्रिनले स्वागत मन्तव्य दिएका थिए । कार्यक्रममा लेखक एवं निर्देशक सनम बैरागले नाटकमा दशक लामो सरकार माओवादी द्वन्द्वले पारेको सामाजिक प्रभाव र समस्यासंगै समाधान खोजिएको जनाए । उनले नेपाली नाटक माया गर्ने दर्शकलाई मात्र कार्यक्रममा आउन आग्रह गर्दै जीगिषा बारमा बियर पिउंदै हेर्ने समय बिताउने खालको नभएको प्रष्टयाए । बैरागले गुणस्तरिय नाटक नहुंदा बेलायतस्थित नेपाली दर्शक यसप्रति अझै आकर्षित हुन नसकेको जनाउंदै आफूले यहां नेपाली नाटक विस्तारको जिम्मा लिने प्रतिवद्धता व्यक्त समेत गरेका थिए ।
कार्यक्रममा कलाकार मनिष श्रेष्ठले नेपाली भाषा, साहित्य र कला संरक्षण एवं नयां पुस्तामा हस्तान्तरण गर्न रंगमञ्च सशक्त माध्यम भएको बताउंदै दर्शकलाई शोमा आइदिन आग्रह गरे । नायक ध्रुव दत्तले फिल्म र नाटकमा अभिनय गर्दा खासै फरक नभएको अनुभूति सांटे ।
अर्की कलाकार प्रसुना कंडेलले कलाप्रति आफ्नो सानै देखिको रुची दर्शाइन् । उनले आफ्नो नशा नशामा कला मिसिएको जनाउंदै नाटकमार्फत सामाजिक चेतना जगाउन पाएकामा खुशी व्यक्त गरिन् ।
उक्त नाटक तेन्जी लामा पाख्रिन, दिल घले र भिजनसंसारडटकमले निर्माण गरेका हुन् भने साउण्ड प्रमोद र संगीत, लाइट्स प्रभाव श्रेष्ठ, कम्प्युटर अभिमन्यू बैराग र स्टेजमा अमृत गुरुङ संलग्न छन् ।
पत्रकार सम्मेलनमा अन्य कलाकारहरु सुरेश श्रेष्ठ, बिकेश बस्नेत र अन्जु श्रेष्ठ समेत सहभागी थिए ।
