बुधबार, कार्तिक ५ २०७७ | Wed, October 21, 2020
नेपालको समय: १२:४२ | UK Time: 07:57

सहारा एकेडेमी अक्षयकोषमा बेलायतबाट आठ लाख ७६ हजार

वीनेपाली
२०७३ माघ १० गते ११:४५

लन्डन । खेलकुदको माध्यमबाट सामाजिक सेवामा समर्पित ‘सहारा क्लब’ पोखराले एकेडेमी दिगो रुपमा सञ्चालन गर्ने उद्देश्यका साथ सुरु गरेको अक्षयकोषमा रु आठ लाख ७६ हजार थप भएको छ ।

रु दुई करोड पुरयाउने मुख्य लक्ष्यका साथ सुरु गरिएको उक्त कोषमा सहारा यूके र वुद्धिष्ट कमिटी सेन्टर यूकेद्वारा रु पांच लाख २५ हजार तथा सहारा अस्ट्रेलियाबाट रु तीन लाख ५१ हजार प्रदान गरिएको हो ।

सहारा क्लब पोखराद्वारा पोखरामा सोमबार आयोजित एक कार्यक्रममा सहारा यूकेका अध्यक्ष मीनबहादुर गुरुङ र सहारा अस्टे«लियाका अध्यक्ष राजमान थकालीले सामूहिक रुपमा क्लबका अध्यक्ष वीरभद्र आचार्यलाई सो रकम हस्तान्तरण गरे ।

राससका अनुसार, कार्यक्रममा सहारा यूकेका अध्यक्ष मीनबहादुर गुरुङले खेलकुदको माध्यमबाट क्लबले कठिन परिस्थितिका बालकको शारीरिक एवम् मानसिक विकासका लागि एकेडेमी सञ्चालन गर्नु प्रशंसनीय भएको बताए ।

त्यस्तै, सहारा अस्ट्रेलियाका अध्यक्ष राजमान थकालीले क्लबले एकेडेमी सञ्चालन गर्दै सामाजिक सेवाका क्षेत्रमा गरेको योगदान सबैका लागि अनुकरणीय भएको बताए ।

क्लबका अध्यक्ष वीरभद्र आचार्यले देश विदेशमा रहेका सहयोगी मनका कारण नै एकेडेमी सञ्चालन गर्न सकिएको बताउंदै दीर्घकालीन व्यवस्थापनका लागि अक्षयकोष सुरु गरिएको जानकारी दिए ।

कार्यक्रममा सहारा यूकेका प्रमुख सल्लाहकार महेश गुरुङ, क्लबका उपाध्यक्ष केशवबहादुर थापा, महासचिव केशव बराल, कुसाङ गुरुङलगायतले सहारा क्लबले सुरु गरेको अक्षयकोषबाट एकेडेमीको सञ्चालनमा महत्वपूर्ण सहयोग पुग्ने विश्वास व्यक्त गरे ।

सोही कार्यक्रममा आहा रारा गोल्डकपका लागि द्वितीय पुरस्कारको प्रायोजन गरेका सहारा अस्ट्रेलियाका अध्यक्ष राजमान थकालीले रु दुई लाख ५१ हजारको चेक पनि हस्तान्तरण गरेका छन् ।

प्रतिक्रिया

सम्बन्धित सामाग्री

फेसबुक