लन्डनमा पृथ्वी जयन्ती

तस्विरः एभरेष्ट गौतम

लन्डन । लन्डनवासी नेपालीले २९५ औं पृथ्वी जयन्ती तथा राष्ट्रिय एकता दिवस मनाएका छन् । संयुक्त राष्ट्रवादी नेपाली संगठन बेलायतले बुधबार हिमालयन क्लव, सडबरी लन्डनमा गरेको एक कार्यक्रममा वक्ताहरुले पृथ्वी नारायण शाहको योगदान स्मरण गरे । उनीहरुले तत्कालिन समयमा शाहले विभिन्न भूभाग एकीकरण गरि आधुनिक नेपाल निर्माण गरेको सम्झंदै उनको राष्ट्रिय एकताको सन्देश अहिले पनि उत्तिकै सान्दर्भिक रहेको धारणा राखे ।

तर, वक्ताहरुले क्रिसमस र भारतीय राष्ट्रपति नेपाल आउंदा बिदा दिने सरकारले राष्ट्रिय निर्माताको जन्म जयन्तीमा भने सार्वजनिक बिदा नदिएकामा आक्रोश पोखेका थिए ।

कार्यक्रमका प्रमुख अतिथी समाजसेवी चिकित्सक डा. राघवप्रसाद धिताल (ओबिइ) ले पृथ्वीनारायण शाहको सामाजिक, आर्थिक, 
सांस्कृतिक तथा राजनीतिक दुरदर्शीताको चर्चा गर्दै उनको दिव्योपदेश अहिले पनि उत्तिकै सान्दर्भिक रहेको टिप्पणी गरे । धितालले देशमा राजनीतिक संक्रमण बढिरहेको उल्लेख गर्दै देश बचाउन विदेशमा बस्ने नेपालीहरु गम्भीर बन्नुपर्ने बेला आएको बताए ।

बीबीसी नेपाली सेवाका पूर्व प्रमुख खगेन्द्र नेपालीले शाहप्रति जे जस्तो अपव्याख्या गरिएपनि उनको राजनीतिक चेत, दुरदर्शीता र एकता भाव वर्तमान राजनीतिमा खांचो रहेको धारणा राखे ।

लेखक तथा गोर्खाली वुद्दिजिवी विकलचन्द्र आचार्यले गोरखा जिल्लाको प्राचीनकालदेखिको इतिहास केलाउंदै पृथ्वीनारायण शाहको एकीकरण अभियानको विस्तृत जानकारी दिएका थिए । आचार्यले गोरखा जस्तो सानो पहाडी जिल्लाका राजाले नेपाल एकीकरणको आंट गर्दाको चुनौती, कुशल नेतृत्व र यसमा योगदान गर्ने सबै पक्षको चर्चा पनि गरेका थिए ।

तस्विरः बीरेन्द्र श्रेष्ठ

संगठनका अध्यक्ष भरत रोका क्षेत्रीको सभापतित्वमा उक्त कार्यक्रम शुरु हुनुअघि मदन थापा र बसन्त रायक्षेत्रीले 
मंगलधुन बजाएका थिए भने सहभागीहरुले शाहको तस्विरमा माल्यार्पण गर्दै श्रद्धा सुमन अर्पण गरे ।

कार्यक्रममा एनआरएनए युरोप संयोजक कुल आचार्य, पूर्व डिएसपीहरु शिवजी श्रेष्ठ र बाचस्पति रेग्मी, समाजसेवी ध्रुव केसी, कृष्ण भट्ट, चिरञ्जिवी ढकाल, कृष्णजंग शाह, बसन्त शाह, भीम बानियां, प्राध्यापक रमेशचन्द्र अधिकारी लगायतले पृथ्वीनारायण शाहको योगदानबारे चर्चा गरे ।

कार्यक्रममा नृपेश उप्रेती, हेमन्त पौडेल, चेतमान केसी, हरिसिंह थापा, कृष्ण भट्ट लगायतले पृथ्वी जयन्तीमा समर्पित कविता वाचन गरेका थिए ।

गणतन्त्र स्थापनापछि नेपाल सरकारले मनाउन छाडेपनि संयुक्त राष्ट्रवादी नेपाली संगठन बेलायतले सन् २०१० देखि बेलायतमा यो जयन्ती मनाउंदै आएको छ । कार्यक्रम संयोजक तथा पृथ्वी जयन्तीका अभियन्ता नारायण अधिकारीले शुरुका दिनमा आलोचना सहेरै भएपनि दिवसलाई निरन्तरता दिइएको बताए ।

कार्यक्रममा बेलायतस्थित विभिन्न नेपाली संघसंस्थाका प्रतिनिधिहरुको सहभागिता थियो ।

प्रतिक्रिया

सम्बन्धित सामाग्री