लण्डन । तमुधिँ साउथ इष्ट लण्डनले आफ्नै भवन खरिद गर्न सफल भएको छ ।
ब्राञ्चका अध्यक्ष श्रीचन्द्र गुरुङले दिएको जानकारी अनुसार आवेउडस्थित ६० पानफिल्ड रोडमा ३ लाख ११ हजार पाउण्डमा सो घर खरिद गरिएको हो ।
तीन वटा शयन कक्ष रहेको सो घर अनलाइन अक्सनबाट तमुधिँ साउथ इष्ट लण्डनले किन्न सफल भएको हो ।
सो घर खरिदका लागि शाखासित २ लाख पाउण्ड मौज्दात रहेको र बाँकी १ लाख ६० हजार पाउण्ड एक सातामा निब्र्याजी सापट उठाइएको थियो । अध्यक्ष गुरुङले आफ्नो दुई वर्षे कार्यकालमा आयआर्जनका काम गरेर सो रकम फिर्ता गरिने बताए ।
सोही क्रममा तमुधिँ साउथ इष्ट लण्डनले यह डिसेम्बर १० मा लाइफ मेम्बरहरुका लागि च्यारिटी डिनरको आयोजना गरेको छ । ब्राञ्चमा अहिलेसम्म १४० लाइफ मेम्बर छन् ।
खरिद गरिएको घरको तल्लो तलामा ब्राञ्चको बैठक र कार्यालय कक्ष तथा माथिल्लो तीन कोठा भाडामा दिइने अध्यक्ष गुरुङले बताए ।
करिब ६ वर्षको अथक प्रयासपछि सो घर लिन सफल भइएको उनले थपे । सो घर हेर्नका लागि आज बिहान १० बजे सदस्यहरुलाई निम्त्याएको थियो ।
साउथ इष्टमा बस्ने दुख पाएका नेपालीहरुको अवस्था हेरेर घर किन्ने निर्णय गरिएको उनले बताए । दुख पाएकाहरुलाई एक साता वा एक महिना राख्न पाए पनि केही सेवा हुन्थ्यो भन्ने लागेको उनले थपे । तमुधिँको घर भए पनि सबै नेपालीलाई स्वागत गर्ने उनले प्रष्ट्याए ।
च्यारिटीमा दर्ता तमुधिँ साउथ इष्टको ठूलो घर किन्ने योजना यथावतै रहेको उनले जानकारी दिए ।
