डा गोविन्द केसी
काठमाडौँ, १३ मङ्सिर । सरकार र आमरण अनशनरत डा गोविन्द केसीका प्रतिनिधिबीचको वार्ता आज पनि निष्कर्षमा पुग्न सकेन ।
सिंहदरवारस्थित शिक्षा मन्त्रालयमा भएको वार्ता सकारात्मक रुपमा अगाडि बढेको भए पनि कुनै निष्कर्षमा नपुगेको स्वास्थ्य मन्त्रालयका सचिव डा सेनेन्द्रराज उप्रेतीले जानकारी दिनुभयो ।
डा केसीका तर्फबाट वार्तामा सहभागी डा लेसन महर्जनकाअनुसार वार्तामा सबै विषय छलफल भए पनि डिन र त्रिविका उपकुलपतिका विषयमा कुरा अगाडि बढ्न सकेन ।
डा केसी १६ दिनदेखि अनशनमा हुनुहुन्छ । केसीको स्वास्थ्य अवस्था नाजुक बन्दै गएको उहाँका सहयोगीले जनाएका छन् । उपकुलपति र डिनलाई बर्खास्त नगरेसम्म अनशन स्थगन नगर्ने डा केसीले अडान राख्दै आउनुभएको छ ।
