हिलारीलाई भोट दिन ओबामाको आह्वान

मस्को (रसिया), १ असोज । रसियाली राष्ट्रपति भ्लादिमिर पुटिनले शनिबार मस्कोमा सञ्चारमाध्यमसँगको कुराकानीमा अमेरिकी राष्ट्रपतिका लागि रिपब्लिकन नेता डोनाल्ड ट्रम्पको नाम नलिए पनि रसियाको ट्रम्पलाई मजबुत समर्थन रहने सङ्केत जनाउनुभएकोे छ ।

“हामीले संयुक्त राज्य अमेरिकामा भएका घटनाहरुलाई नजिकबाट हेरिरहेका छौँ र निश्चय नै हामीले जसले समानताका आधारमा रसियासँगको सम्बन्ध विस्तारमा चासो व्यक्त गर्छ उसप्रति सहानुभूति राख्छौँ” – रसियाली राष्ट्रपति पुटिनले भन्नुभयो ।

उहाँका यी भनाइ अमेरिकी राष्ट्रपतिका उम्मेदवार ट्रम्पप्रति स्पष्ट सङ्केत गरिएका स्वर भएका रसियाली सञ्चारमाध्यमले बताएका छन् ।

केही समय पहिले ट्रम्पले रसियाली शक्तिशाली नेता पुटिन अमेरिकी राष्ट्रपति बाराक ओबामा भन्दा राम्रो राष्ट्र नेता भएको भनी आफ्नो चुनावी अभियानमा बोल्नुभएको थियो ।

यद्यपि रसियाली राष्ट्रपति पुटिनले अमेरिकी राष्ट्रपतिका कुनै पनि उम्मेदवारप्रति सार्वजनिक रुपमा समर्थन जनाउन अस्वीकार गर्दै आउनुभएको छ ।

ट्रम्पद्वारा रसियाली राष्ट्रपति पुटिनलाई अमेरिकी राष्ट्रपति ओबामाभन्दा शक्तिशाली राष्ट्र नेता भनी दिएको अभिव्यक्तिलाई लिएर खासगरी हिलारी क्लिन्टनलगायत लाखौँ अमेरिकीले उहाँको आलोचना गरेका थिए ।

पुटिन र ट्रम्पको भेट भएको कुनै प्रसङ्ग त सार्वजनिक भएको छैन तर क्लिन्टन विदेशमन्त्री भएका बेला पुटिनले तनावग्रस्त क्षणहरुको सामना गर्नुपरेको रसियाली राष्ट्रपतिको दाबी छ । सन् २०१२ को निर्वाचन अभियानमा रहेका बेलासमेत क्लिन्टनले हस्तक्षेपकारी भूमिका निर्वाह गर्न खोजेको आरोप पुटिनको छ ।

पुटिनको तेस्रो कार्यकालमा अमेरिका विरुद्ध रसियाली सञ्चारमाध्यममा अभिव्यक्तिहरु दिएको र रसियामा अमेरिकी प्रभावलाई न्यून गर्नेतिर बढी लागेको बताइन्छ । उहाँले अमेरिकीद्वारा रसियाली बालबालिकालाई धर्मपुत्र बनाएर लाने प्रवृत्तिलाई निरुत्साहित गर्नुका साथै कैयौँ अमेरिकी गैरसरकारी सङ्घसंस्थालाई रसियामा प्रतिबन्ध लगाउने जस्ता कार्यलाई अभियानका रुपमा अगाडि ल्याउनुभएको थियो ।