कर्णेल लामाले जिते मुद्दा

लन्डन । झन्डै साढे तीन वर्ष देखि बेलायतमा यातना सम्वन्धि मुद्दा खेपिरहेका नेपाली सेनाका महासेनानी कुमार लामाको पक्षमा फैसला भएको छ ।

अभियोजन पक्षले लामालाई दोषी ठहरयाउन सक्ने पर्याप्त आधार नभएको भन्दै मुद्दा अघि नबढाउने निर्णय लिएपछि लन्डनस्थित सेन्ट्रल क्रिमिनल कोर्ट (फौज्दारी अदालत) ओल्ड बेलीमा मंगलबार कोर्ट नम्बर ६ मा जस्टीस स्वीनी नेतृत्वको इजलासले लामालाई निर्दोष सावित गर्दै मुद्दा टुंग्याएको हो ।

‘न्यायको जित भएको छ’, फैसलापछि ओल्ड बेली बाहिर कर्णेल लामाले कान्तिपुरसंग यत्ति बोले । ज्यादै हंसिलो देखिएका लामाले नेपाली सेनाको अनुमति बिना थप बोल्न नमिल्ने बताए । तस्विर खिच्न आग्रह गर्दा उनले हांसेर टारिदिए, ‘भाइ फोटो नखिचौं होला ।’ लामाका साथ उनकी छोरी पनि आएकी थिइन् ।

लामाले ११ वर्षअघि कपिलवस्तु जिल्लाको गोरुसिंगेस्थित एक सैनिक व्यारेकमा थुनामा रहेका जनकबहादुर राउत र करम हुसेनलाई यातना दिएको अभियोग लगाएको थियो ।

गत महिना करिब सात हप्ताको सुनुवाइपछि लामाले यातना सम्वन्धि दुई मध्ये करम हुसेनको मुद्दामा सफाइ पाएका थिए ।
लामामाथि बेलायती क्रिमिनल जस्टिस एक्ट १९८८, १३४ (१) अन्तर्गत मुद्दा चलाइएको थियो । दक्षिण सुडानस्थित संयुक्त राष्ट्रसंघको शान्तिस्थापक सेनामा खटिएका बेला छुट्टीमा परिवार भेटन बेलायत आउंदा सन् २०१३, जनवरी ३ मा लामालाई लन्डन मेट्रोपोलिटन प्रहरीले पक्राउ गरेको थियो ।

अन्तिम फैसला सुन्न बीबीसी नेपाली सेवाका भगिरथ योगी, कान्तिपुरका यूके संवाददाता नवीन पोखरेल र सुरक्षा सम्बन्धि अध्ययन गरिरहेका नारायण अधिकारी दिनभर प्रतिक्षारत थिए ।

इकान्तिपुर