साउथ ह्यारोमा तीजको लहर आयो बरिलै…

लन्डन । नेपलिज ब्रिटिस कम्युनिटी (एनबीसी) यूकेले शनिबार सांझ ह्यारो बरो फुटबल क्लवमा तीज विशेष कार्यक्रम गरेको छ । कार्यक्रममा तीज गीतमा महिलाहरु मज्जाले नाचे अनि दर खाए ।

एनबीसीका एक्जुकेटिभ अफिसर समिरनाथ प्याकुरेलले सञ्चालन गरेको कार्यक्रममा अध्यक्ष कमलराज खनालले तीज पर्वको शुभकामना दिंदै नेपाली कला, संस्कृतिलाई प्रवासमा समेत जीवन्त राख्न जरुरी रहेकोमा जोड दिए । सचिव मिलन घिमिरेले सहभागी सबैलाई धन्यवाद दिंदै तीज पर्वको 
सांस्कृतिक महत्वबारे बताए ।

कार्यक्रमको शुरुमा हालै दिवंगत गायक खेम गुरुङप्रति श्रद्धाञ्जलि अर्पण 
गर्दै उनको चर्चित गीत वारी जमुना पारी जमुना….बजाइएको थियो । त्यस लगत्तै इन्दिरा पौडेल, अन्जु रेग्मी, कल्पना खनाल, सुमित्रा शर्मा, लक्ष्मी गौतम, जमुना ढकाल, रेनुका पाण्डे, पार्वती सिलवाल र पूजा आचार्यले सामूहिक तीज गीत गाएका थिए । सुस्मिता सिग्देल र प्रज्ञा खनालले सिरैमा शिरबन्दी रिमिक्स गीतमा नृत्य देखाए । रिमा भण्डारी, रिता भण्डारी, निशा ढकाल, लक्ष्मी गौतम, सुजाता ढकाल लगायतले पनि एकल नाच देखाएका थिए ।

कार्यक्रम विल्कुल सांगीतिक माहोलमा भएको हो । साउण्ड इन्जिनियर 
हेमराज विष्टको ननस्टप डिजे अनि तीज गीतमा सहभागी अबेरसम्म नाचेका थिए । उक्त अवसरमा चौतारी रेष्टुरेन्टले खाना व्यवस्था गरेको थियो । कार्यक्रमलाई  आइएमइ यूकेका कमल पौडेल, एनआरएनए यूके आइसीसी सदस्य एवं क्रिस फुडका कृष्ण तिमिल्सिना, प्रभु न्यौपाने, चौतारी रेष्टुरेन्टका सञ्चालक गंगा राना, चुडामणी रेग्मी लगायत व्यवसायीले प्रायोजन गरिदिएका थिए ।

तस्विरः शिव भण्डारी