बिहीबार, साउन २१ २०७८ | Thu, August 05, 2021
नेपालको समय: ०३:५२ | UK Time: 23:07

एडिनबरा फेस्टिवलमा पहिलोपटक नेपाली सेनाको ब्याण्ड

वीनेपाली
२०७३ साउन २५ गते २२:०३

Nepal army band

लन्डन । शुक्रबारबाट स्कटल्याण्डमा शुरु विश्वकै चर्चित एडिनबरा फेस्टिवलमा पहिलोपटक नेपाली आर्मी ब्याण्डले आफ्नो कला प्रस्तुत गरिरहेको छ । फ्रिंज फेस्टिवलको नामले चिनिने उक्त कला संगीत महाउत्सबमा नेपाली आर्मीको ब्याण्डले पहिलो पटक सहभागिता जनाएको हो । आगामी अगस्ट २९ सम्म चल्ने उक्त फेस्टिवलमा भाग लिन ५० जना सम्मिलित नेपाली सेनाको ब्याण्ड बेलायत आएको छ । केहि दिनको प्रशिक्षण र रिहर्शल पुरा गरिसकेको नेपाली सेनाले महोत्सव अवधिभर आफ्नो प्रस्तुति दिने ब्याण्ड प्रमुख कर्नेल अमुल कार्की ढलीले जानकारी दिए । रोयल मिलिटरी टाटुको सहयोगमा भाग लिन पाउंदा खुशी लागेको बताउंदै अमुलले भने, यो मेरो व्यक्तिगत खुशी मात्र होइन प्रतिनिधि राष्ट्र नेपालको गौरव पनि हो । महोत्सवबारे थप जानकारी दिदै उनले भने, आफ्नो प्रस्तुति हेरिसकेपछि मुल आयोजकले हाम्रो मौलिक बाजा नरसिम्हाबाट नै महोत्सव शुरु गरेकाले हामी झनै उत्साहित छौं ।

नेपालको प्रस्तुति बेलुकी

रोयल मिलिटरी टाटु अन्तर्गत नेपाली सेनाले आफ्ना कार्यक्रम प्रदर्शनको अवसर पाएको हो । आइतबार बाहेक हरेक दिन बेलुकी ०९ः ३० मा नेपाली सेनाको प्रस्तुति रहने छ । करिब ७ मिनेटको यो प्रस्तुतिलाई नेपाली सेनाले आफ्नै मौलिक तरिकाले पस्कने गरेको छ । शो सारंगीको धुनबाट शुरु हुनेछ । लगत्तै रातो र चन्द्र सूर्य भन्ने धुनमा नौमती बाजा बज्नेछ र जय जन्मभूमि भन्ने धुनसंगै बेलायती र नेपाली झन्डा प्रतिकात्मक सगरमाथामा फहराइनेछ । अन्तमा भने बीर गोर्खालीको गाथा स्वरुप यो नेपाली शिर उचाली… भन्ने धुनमा खुकुरी नाच प्रदर्शन गरिनेछ ।

आकर्षक पर्यटकीय गन्तब्य स्कटल्याण्डको सांस्कृतिक महोत्सव हो एडिनबरा फेस्टिवल । स्कटिस राजधानीमा हुने यो महोत्सव बिश्वकै ठूला मध्येको एक हो । सन् १९४७ बाट अनौपचारिक रुपमा शुरु भएको यस महोत्सवमा घरेलु र संसारभरिका लाखौं दर्शकले अवलोकन गर्छन् । महोत्सबमा यस वर्ष २९४ फरक ठाउँमा ३ हजार बढि प्रस्तुति हुने र दुई लाख भन्दा बढि दर्शक प्रत्यक्ष सहभागी हुने अपेक्षा गरिएको छ ।

रोयल मिलिटरी टाटु

एडिनबरा फेस्टिवलको महत्वपूर्ण प्रस्तुति हो रोयल मिलिटरी टाटु । ४८ देशका वाद्यवादकले प्रस्तुति दिने यस उत्सब ५० लाख भन्दा बढी दर्शकले हेर्नेछन् । एडिनबरा क्यासल अगाडीको प्रागंणमा देखाइने मिलिटरी टाटुमा ५ ब्रिटिश मिलिटरी ब्याण्ड, २५० स्कटिस पाइपर र ड्रमरका साथै अन्तर्रास्ट्रिय प्रस्तुतिहरु हुनेछन् साथमा प्रसिद्ध ड्यानी बोयलको टिमको लाइट शो हुनेछ ।

प्रतिक्रिया

सम्बन्धित सामाग्री

फेसबुक