जुरीमा अल्झियो कर्णेल लामाको फैसला

लन्डन । कर्णेल कुमार लामा विरुद्धको मुद्दालाई अन्तिम टुंगो लगाउन 
१२ सदस्यीय जुरी शुक्रबार पनि निष्कर्षमा पुग्न सकेन । जस्टीस स्वीनी नेतृत्वको इजलासमा वादी तथा प्रतिवादीका तर्फबाट वहस सकिएपछि गत सोमबार दिउसो देखि जारी डेलिबरेसन (गहन छलफल) अझै निष्कर्षमा पुग्न नसकेको हो । निर्दोष वा दोषी जे सावित गरेपनि १२ जनाको जुरीबीच १०, २ वा ११, १ मत भएमात्र अन्तिम फैसलाको बाटो खुल्नेछ नत्र पुनः सुनुवाइ (रि ट्रायल) हुने कानुनी प्रावधानले पटक पटक जुरीबीच छलफल चलिरहेको छ । 
शुक्रबारसम्म सहमति हुन नसकेपछि न्यायधिशले सोमबार पुनः इजलास बस्ने जनाउ दिएका छन् ।

लन्डनस्थित सेन्ट्रल क्रिमिनल कोर्ट (फौज्दारी अदालत) ओल्ड बेलीमा करिब सात हप्ताको सुनुवाइ सकिएपछि जुरी अन्तिम फैसला लिन डेलिबरेसनमा व्यस्त भएको हो । जुरीमा हरेक क्षेत्रका व्यक्ति सहभागी हुन सक्छन् ।

‘अगष्टदेखि समर छुट्टी हुनु अघि फैसला आउने आशा थियो तर अझै कति समय लम्बिने हो भन्न सकिन्न’, श्रोत भन्छ ।

नेपाली सेनाका महासेनानी लामाले ११ वर्षअघि कपिलवस्तु जिल्लाको गोरुसिंगेस्थित एक सैनिक व्यारेकमा थुनामा रहेका जनकबहादुर राउत र करम हुसेनलाई यातना दिएको अभियोग छ । बेलायती क्रिमिनल जस्टिस एक्ट 
१९८८, १३४ (१) अन्तर्गत उनी विरुद्ध लगाइएको मुद्दालाई राष्ट्रिय 
अन्तर्राष्ट्रिय आंखाले नजिकबाट नियालिरहेको छ ।

दक्षिण सुडानस्थित संयुक्त राष्ट्रसंघको शान्तिस्थापक सेनामा खटिएका बेला छुट्टीमा परिवार भेटन बेलायत आउंदा सन् २०१३, जनवरी ३ मा लामालाई लन्डन मेट्रोपोलिटन प्रहरीले विश्वव्यापी क्षेत्राधिकार अन्तर्गत पक्राउ गरेको थियो ।

लामाको मुद्दामा नेपाल सरकारले पटक पटक कुटनीतिक तथा कानुनी पहल गरेपनि बेलायतले वास्ता गरेन ।