लण्डन । काङमाङ नरेश राईको पछिल्लो पुस्तक ‘फियरलेस वरिवर्स’ जेम्स् ट्याइट ब्लाक बुक प्राईज् बायोग्राफी २०१६ का लागि नोमिनेशनमा परेको छ ।
कविताबाट साहित्य लेखन शुरु गरेका काङमाङ नरेश राईको सो पुस्तक वेलायतको कमर्सियल प्रकाशन हाउस् ओलम्पियाबाट प्रकाशित भएको हो । उनको सो कृतिलाई प्रकाशन हाउसले “जेम्स् ट्याईट ब्लाक बुक प्राईज् बायोग्राफी २०१६” को लागि नोमिनेशनमा पारेको हो ।
सन् १९१९ मा स्थापना भएको यो पुरस्कार बायोग्राफी, फिक्सन र ड्रामा गरी तीन विधालाई प्रदान गरिन्छ । यो पुरस्कार प्रकाशन हाउस्ले नोमिनेसन गरेको अंगे्रजी भाषामा लिखित कृतिलाई मात्र मान्यता दिने गर्दछ ।
सन् १९१९ मा पहिलो बायोग्राफी पुरस्कार हेनरी फेस्टिङ्ग जोनले पाएका थिए । उनले “सामुयल बटलर” उपन्यासकारको बारेमा लेखेका थिए । “सामुयल बटलर” अथर अफ रेहन उपन्यासका लेखक पनि हुन् । युटोपियन र रेहनसेमी अटोबायोग्राफी नोवल उनका चर्चित कृतिहरु हुन् ।
नोमिनेसनमा परेको काङमाङको यस कृति नेपाली भाषामा दोस्रो संस्करणको रुपमा आउन लागेको छ । नेपाली भाषामा “खुकुरीको धारमा दुई शताब्दी” प्रकाशित भइसकेको छ । कृतिका वास्तविक कथाहरु पढिरहँदा युद्ध भूमिमा छाडेर आएका लाहुरे साथीहरुको पीडाले घोचिरहन्छ, । लाहुरेहरुले लडेको युद्ध, भोगेका दुःख र वीरताको तस्बिरै तस्बिरले भरिएको छ, उनको यस कृति “फियरलेस वरिवर्स” ।
पुरस्कार जित्ने आशा कस्तो छ भनी सोध्दा उनले भने, ‘पुरस्कार जित्छ वा जित्दैन तर म तेस्रो मुलुकको लेखक, त्यो पनि सेकेण्ड हेण्ड लेखकको लागि नोमिनेशनमा पर्नु नै ठूलै पो हो भन्ने लागेको छ र आशा पनि ज्यूँदै रहेको छ ।’
उनले अर्का साहित्यकार अप्जसे कान्छासंग मिलेर तारा राईद्धारा लिखित छापामार युवतीको डायरीलाई अंग्रेजीमा अनुवाद गरी बेलायतको कमर्सियल प्रकाशन हाउसबाट प्रकाशित गर्न लागेका छन् ।
