भलिवलमा भिड्दै चाल्टर्न क्षेत्रका महिला

लन्डन । चाल्टर्न नेपाली समाजको वार्षिक भेटघाट तथा समर बार्बेक्यू कार्यक्रम गत वर्षभन्दा अलिक पृथक शैलीमा हुंदैछ भोलि आइतबार । चाल्टर्नस्थित मेरिडियन स्पोर्ट्स क्लब मैदानमा हुने कार्यक्रममा यसपाली चाल्टर्न क्षेत्रका महिलाहरु समेतको भलिबल प्रतियोगिता हुने भएकाले कार्यक्रममा झनै रौनक थप्ने अपेक्षा छ । महिला भलिबलमा ३ टोली भिड्दैछन् । महिला टिममा क्याप्टेनहरु संगीता मगर, रत्ना शाही र पार्वती कंडेल ले नेतृत्व गर्दैछन् भने पुरुषहरुतर्फ ६ टोलीबीच प्रतिपष्पर्धा हुने भएकाले खेल निकै आकर्षक हुने समाजका उपाध्यक्ष तथा खेल आयोजक समितिका संयोजक टंक कंडेलले बताए ।

खेल सफल पार्न समाजका अध्यक्ष रोमनाथ पाण्डे, सल्लाहकारहरु रेश्मी खड्का, दीपक भट्ट र र प्रकाश खरेल सक्रिय छन् ।

यूकेमै पनि परिचित राधिका हमाल, रामजी खांड र थानेश्वर गौतमको सांगीतिक प्रस्तुति कार्यक्रमको अर्को आकर्षण हुने आयोजकले जनाएका छन् । गौतम लोक भाकाको सालैजो, रोइला तथा गजलमा चर्चा कमाएका कलाकार हुन् ।

कार्यक्रममा प्रवेश शुल्क वयस्कहरुका लागि १० पाउण्ड तोकिएको छ भने ५ वर्ष मुनीका वालवालिकाको हकमा फ्रि र ५ देखि १० वर्ष सम्मका लागि ५ पाउण्ड लाग्ने जनाइएको छ । कार्यक्रम दिनको १२ बजे देखि खुला चौरमा बार्बेक्यूसंगै शुरु भएर सांझ ७ बजे समापन हुनेछ ।

चाल्टर्न समाजका अध्यक्ष रोमनाथ पाण्डेले समाजले न्यूनतम शुल्कमा अधिकतम मनोरन्जन सहितको बार्बेक्यू तय गरिएको भन्दै स्थानीय तथा अन्य क्षेत्रका इच्छुक नेपालीहरुलाई सहभागी हुन आव्हान गरेका छन् ।

यो क्षेत्रका उल्लेख्य नेपालीहरुको उपस्थितिमा हरेक वर्ष आयोजना हुने समाजको वार्षिक समर भेटघाट खेलकुद, सांस्कृतिक कार्यक्रम तथा मनोरन्जनका हिसावले चर्चित बन्ने गरेको छ ।