लर्डस लैजान तयार छन् १२० स्वयंसेवक

लन्डन । आज १९ जुलाइ मंगलबार । बेलायतको नेपाली समुदायले प्रतिक्षा गरिरहेको विशेष दिन । आज लर्डसमा नेपाली क्रिकेट टिम पहिलो पटक अवतरण हुंदैछ एमसीसीसंग खेल्न । बेलायत नेपाल कुटनीतिक सम्वन्ध स्थापनाको दुई सय वर्षका अवसरमा जुरेको यो साइत फेरि दोहोरिएला नदोहोरिएला । तर, नेपालीका लागि यो ऐतिहासिक हुनेछ ।

लर्डस क्रिकेट मैदान कसरी जाने त ? धेरैलाई अलमल छ भने चिन्ता लिनु पर्दैन् । कुल १२० जना स्वयंसवेक तपाईंहरुलाई सहयोग गर्न तयारी अवस्थामा रहनेछन् ।

नर्सिङ एसोसिएसन यूकेकी प्रसुना कंडेलको नेतृत्वमा बेकर स्ट्रिट स्टेशनमा करिब १५ जना र सेन्ट जोन्स् उड स्टेशनमा टियर वान इन्टरप्रेनरका तर्फबाट शालिक सापकोटाको नेतृत्वमा १५ जना स्वयंसेवक बाटो देखाउन र अन्य गाइड गर्न रहनेछन् ।

गेटमा टिकेट किनिदिन एवं भित्र पठाउन सहजकर्ताका रुपमा मगर संघका बम थापा मगर, एचएसएमपीका दीप गिरी र तमुधिंका ज्ञाम गुरुङको नेतृत्वमा ३० जना, खेल मैदानको चारै तिर र नजिकको बस स्टेशनमा करिब २० जना र विशेष स्वंयसेवकका रुपमा लर्डससंगको सहकार्यमा खेल मैदान भित्र वरपरका लागि संयोजक कृष्ण प्रसाद शर्माको नेतृत्वमा १३ जना एवं युवा परिचालन समितिका सदस्य समिर गुरुङको नेतृत्वमा अन्य २ दर्जन भन्दा बढि स्वयंसेवक परिचालित हुनेछन् । खेल समाप्त भएपछि बेलुका पनि पुनः तिनिहरुबाटै सहयोग हुनेछ ।

नेपाली दर्शकले स्टेशनहरूमा नेपाली झण्डा राखेर परिचयपत्र लगाएको देखेमा उनीहरूसंग खेलसंग सम्बन्धित कुरा सोध्न सकिनेछ ।

खेल हेर्नका लागि ड्रेस कोड के भन्ने अन्यौलता पनि बढेको छ । पेभिलियनबाहेक सर्वसाधारण दर्शकले क्रिकेटकै लोगो अंकित जर्सी वा अन्य टिसर्ट र सफ्ट जिन्स लगाएर खेल हेर्न सक्ने लन्डनस्थित नेपाली दूतावासले जनाएको छ । फेन्सी ड्रेस, झन्डा वा ब्यानर भने ग्राउण्ड भित्र प्रतिवन्ध छ ।