बेलायती व्यवसायीलाई नेपालमा लगानी गर्न आग्रह

लन्डन । नेपालमा लगानी गर्न बेलायती व्यवसायीलाई आग्रह गरिएको छ । साउथ इष्ट लन्डन च्याम्बर अफ कमर्सका प्रतिनिधिहरु सम्मिलित एक भेटघाटमा नेपाल पर्यटन बोर्डका बेलायत प्रतिनिधि पशुपति भण्डारीले नेपालमा लगानीका प्रचुर सम्भावना रहेको बताएका हुन् । बेलायत नेपाल कुटनीतिक सम्वन्ध स्थापनाको दुई सय वर्षका अवसरमा समेत आयोजित उक्त दिवा भोजमा व्यवसायी भण्डारीले नेपालमा लगानी र व्यापार व्यवसाय गर्न बेलायती व्यवसायीलाई प्रेरित गरे । उनले नेपाल भ्रमणका लागि सुरक्षित रहेको जानकारी दिंदै नेपालको पर्यटन प्रवर्धन हुने भिडियो सामाग्रीसमेत प्रदर्शन गरे ।

भण्डारीले आगामी जुलाई १९ मा लर्डस क्रिकेट ग्राउण्डमा नेपाली टिम र एमसीसीबीच मैत्रीपूर्ण खेल हुन लागेको जानकारी दिंदै खेलमा सहभागी भएर नेपालको पुनर्निर्माणमा सघाउन अपिल गरेका थिए । उनले भूकम्पपछि स्वतस्फूर्त सहयोग गर्ने बेलायतीलाई धन्यवाद समेत दिए ।