लन्डन । बेलायतका क्रियाशिल दुई संस्था ग्रेटर रसमोर नेपलिज कम्युनिटी र ब्रिटिश गोर्खा वेलफेयर सोसाइटीको आर्थिक सहयोगमा सिन्धुपाल्चोकस्थित भिमटार १ मा विद्यालय निर्माण भएको छ । ति संस्थाको आर्थिक सहयोगमा परोपकार निमाविमा रु ११,२५,८०० (एघार लाख, पच्चीस हजार आठसय पचास रुपैयां) को लागतमा निर्माण गरिएको दुई कोठे भवन आइतबार एक कार्यक्रमबीच विद्यालय व्यवस्थापन समितिलाई हस्तान्तरण गरिएको हो ।

कार्यक्रममा ग्रेटर रसमोर नेपलिज कम्युनिटी र ब्रिटिश गोर्खा वेलफेयर सोसाइटीको प्रतिनिधित्व गरेर गएकी कार्यक्रमकी प्रमुख अतिथि शिक्षिका प्रमिला केसी बानियाले विद्यालय समितिलाई उक्त भवन हस्तान्तरण गरिन् । केसीले ग्रेटर रसमोर नेपलिज कम्युनिटी अध्यक्ष ओम थापाले बेलायतबाट विद्यालय व्यवस्थापन समितिलाई पठाएको शुभकामना सन्देश पढेर सुनाएकी थिइन् । थापाले सन्देशपत्र मार्फत संस्थाद्धारा पटक–पटक गरेर पठाइएको कुल रकम १२ लाख ९८ हजार ७८० रुपैयांमध्ये भवन बनाएर बांकी रहेको १ लाख ७२ हजार ९ सय ८० रुपैयां विद्यालयको आन्तरिक व्यवस्थापन (लाइबेरी, शैक्षिक सामाग्री र फर्निचर) मा खर्च गर्न समेत विद्यालय व्यवस्थापन समितिलाई अनुरोध गरेका छन् ।

स्कुलका प्रधानाध्यापक विदुर नेपालले 
दुवै संस्थालाई धन्यवाद दिंदै विद्यार्थीहरुको सुखद भविष्यका लागि अझ 
प्रतिवद्ध भएर लाग्ने बताए । त्यस्तै स्कुल व्यवस्थापन समितिका अध्यक्ष गणेश प्रसाद अधिकारीले भूकम्पले नाजुक बनाएको विद्यालयको समस्यालाई नजिकबाट नियालेर दुई कोठे भवन बनाउन सहयोग गरेर ऐतिहासिक काम गरेको भन्दै सहयोगदातालाई धन्यवाद दिए ।

दनुवार र माझी समुदायका बालबालिकाको संख्या बढि रहेको उक्त विद्यालयमा अन्य समुदायका समेत गरेर १५० बालबालिका अध्ययनरत 
छन् ।