प्रधानमन्त्री क्यामरुनले अक्टोबरसम्म राजिनामा दिने

लन्डन । बेलायत ईयूमा रहनुपर्छ भन्ने पक्षमा सशक्त वकालत गर्दै आएका प्रधानमन्त्री डेभिड क्यामरुले आफ्नो पदबाट राजिनामा दिने घोषणा गरेका छन् । बिहीबारको ऐतिहासिक जनमत संग्रहमार्फत बेलायत ईयूबाट बाहिरिने भएपछि क्यामरुनले शुक्रबार बिहान आफ्नो कार्यालय अगाडि सम्वोधन गर्दै अक्टोबरसम्म पद छाड्ने बताएका हुन् । उनले विकसित परिस्थितिमा देशले नयां राजनीतिक नेतृत्व चाहेको बताए । बेलायत उच्चतम लोकतान्त्रिक अभ्यासमा उत्रिएको बताउंदै क्यामरुनले जनमत संग्रहमा सहभागी भएका करिब ३३ मिलियन जनतालाई धन्यवाद समेत दिए ।

भावुक रुपमा प्रस्तुत भएका प्रधानमन्त्री क्यामरुनले बेलायत ईयूमा रहंदा सुरक्षित, बलियो र समृद्ध हुने आफ्नो स्पष्ट धारणा दोहोर्याउंदै ब्रिटिश जनताको निर्णयलाई सम्मान गरिने जनाए । क्यामरुनले युरोपमा रहेका बेलायती र बेलायतमा रहेका युरोपेली नागरिकको अवस्थामा तत्काल केही परिवर्तन नहुने स्पष्ट पारेका छन् । उनले युरोपेली मुलुक आवतजावत गर्न, सामान आयत निर्यात र अन्य सेवामा केही असर नपर्ने समेत बताए ।