एनआरएनए यूके उपाध्यक्ष हिराधन राई

लन्डन । लर्डसमा हुने एमसीसी (मार्लेबोन क्रिकेट क्लव) र नेपाली क्रिकेट टिमबीचको मैत्रीपूर्ण खेल सफल बनाउन एनआरएनए यूकेले उपाध्यक्ष हिराधन राईलाई संयोजक तोकेको छ । खेल गतिविधिमा विशेष चासो राख्ने राईले संयोजक तोकिएसंगै आफ्नो जिम्मेवारी पुरा गर्ने प्रतिवद्धता व्यक्त गरेका छन् । उनले एनआरएनए यूके सल्लाहकारहरु शिवजी श्रेष्ठ, भिम महेन्द्र गुरुङ, उपाध्यक्ष शान्ति थापा कुंवर, प्रवक्ता खुशी लिम्बु र सदस्य डा. राजेन्द्र थापालाई आफ्नो टिममा राखेर काम थालेका हुन् ।

राईले खेलबारे जानकारी दिन एवं भावी रणनीति तय गर्ने सम्वन्धमा छलफल गर्न यही शुक्रबार विभिन्न संघसंस्थाका प्रतिनिधि र सञ्चारकर्मीहरुको एउटा भेला समेत राखेको जनाए । राईले बेलायत नेपाल कुटनीतिक सम्वन्ध स्थापनाको दुई सय वर्षका अवसरमा हुन लागेको उक्त खेल विशेष महत्वको भएकाले सहभागी भइदिन सबैमा आग्रह गरेका छन् ।

जुलाई १९ मा हुने उक्त ऐतिहासिक खेल सफल बनाउन लन्डनस्थित नेपाली दूतावास, नेपाल पर्यटन बोर्ड यूके र युवाहरुको विशेष 
संलग्नता छ । कम्तीमा दश हजार दर्शक उतार्न आयोजक लागिरहेका छन् ।

खेल हेर्न प्रवेश शुल्क जम्मा दश पाउण्ड तोकिएको छ । टिकेट विक्रीबाट संकलित रकमको ५० प्रतिशत नेपालको पुनर्निर्माणमा जाने भएकाले सबै बेलायतवासी नेपालीलाई सहभागी भइदिन आयोजकले अपिल गरेका छन् ।

६५ वर्ष माथिकालाई ५ पाउण्ड र १६ वर्ष मुनीकालाई निशुल्क हुने उक्त खेलको टिकेट अनलाइन, प्रिन्टेड र खेल हुने दिन ढोकैमा किन्न सकिनेछ ।