सयपत्रीको दशौं वर्ष गांठ विशेष हुने

लन्डन । सयपत्री नेपाली कल्चरल ग्रुप यूकेले स्थापनाको दशौं वर्ष गांठ विशेष कार्यक्रमसहित मनाउने भएको छ ।

दशौं वार्षिक उत्सवका अवसरमा ग्रुपले आगामी २४ जुलाई सांझ अल्डरसटस्थित किङस सेन्टरमा सयपत्री सांझ कार्यक्रम गर्दैछ । सांझ ६ बजेदेखि शुरु हुने कार्यक्रम अविष्मरणीय बनाउने हेतुले सयपत्री समूहले राष्ट्रिय तथा स्थानीय कलाकारको जमघट गराउने तयारी गरेको संस्थाका प्रमुख एल बी गुरुङले जानकारी दिए ।

राष्ट्रियस्तरका गायक गायिका अन्जना गुरुङ, कन्हैया सिंह, मनसुधन थापा, सुवास गुरुङ साथै स्थानीय कलाकारहरु शशी गुरुङ, महेश गुरुङ, कविता गुरुङ र प्रभु गुरुङले कार्यक्रममा बेजोड प्रस्तुति दिने जनाइएको छ । कार्यक्रम थप मनोरन्जनात्मक बनाउन बालनृत्य, लाइभ म्यूजिक, एकल 
एवं समूहगत नृत्य रहने समूहले जनाएको छ । कार्यक्रममा कम्तीमा एक हजार दर्शक उतार्ने लक्ष्य छ ।
कार्यक्रम ऐतिहासिक हुने दाबी गर्दै संस्थाले बेलायतस्थित विभिन्न संघ 
संस्थाका प्रतिनिधि एवं दर्शकहरुमा उपस्थितिका लागि अपिल गरेको छ ।
कार्यक्रममा आउने वकिङबासीहरुलाई सुविधाका लागि बसको व्यवस्था समेत गरिने आयोजकले बताएका छन् ।
बेलायतमा रहेर पनि नेपाली कला संस्कृतिको जगेर्ना गर्दै यसलाई जीवन्त राख्न सन् २००६ मा संस्था गठन भएको थियो ।