प्रधानमन्त्री केपी शर्मा ओली सोमबार चिनीयाँ आरोही Wang Jing को दोस्रो कृति साइलेन्स अफ द समिटको प्रधानमन्त्री निवास बालुवाटारमा सार्वजनिक समारोह । तस्बिर ः रोशन सापकोटा, रासस
काठमाडौँ, १७ जेठ । नेपालको साहसिक पर्यटन (पर्वतारोहण) बारे पुस्तकका माध्यमबाट विश्वभर प्रचार गर्दै आएकी चिनियाँ आरोही वाङ जिङको दोस्रो कृति ‘साइलेन्स अफ द समिट’ सार्वजनिक भएको छ ।
सर्वोच्च शिखर सगरमाथाको तीनपटक सफल आरोहण गरेकी लेखक वाङले आफ्नो पछिल्लो पुस्तकमा सगरमाथासहित सात महादेशका अग्ला हिमालको अवस्था र आरोहण भोगाइबारे उजागर गर्नुभएको छ ।
त्यस्तै पुस्तकमा आरोही वाङले सात महादेशका आठ हजार मिटरभन्दा अग्ला हिमाल आरोहणका अनुभूति र अवस्थितिलाई पुस्तकमा समेटिएको छ ।
एभरेष्ट फिउचर फाउन्डेसनले प्रकाशनमा ल्याएको उक्त पुस्तकमा आरोही वाङले १४३ दिनमा विश्वका सात महादेशका आठ हजार मिटरभन्दा अग्ला हिमालको उत्तर र दक्षिण दिशाबाट आरोहण गरेको र तिनको सांस्कृतिक महत्वलाई समेत उल्लेख गरिएको छ ।
आरोही वाङ्को उक्त पुस्तक प्रधानमन्त्री निवास बालुवाटारमा आज आयोजित एक समारोहमा प्रधानमन्त्री केपी शर्मा ओलीले सार्वजनिक गर्नुभयो ।
चिनियाँ र अङ्ग्रेजी भाषामा प्रकाशित सो पुस्तक नेपालको पर्वतीय पर्यटनमा उपयोगी हुने अपेक्षा गरिएको छ ।
आरोही वाङले यसअघि सन् २०१३ मा ‘माउन्टेनरिङ लाइफ एट अल्टिच्युड’ नामक पुस्तक पनि प्रकाशन गर्नुभएको थियो ।
नेपाल सरकारबाट इन्टरनेसनल माउन्टेनर–२०१४ सम्मानित तथा नेपाल–चीन सद्भावनादूत–२०१५ समेत रहेकी वाङले सफल महिला व्यवसायीका रुपमा चीनका विभिन्न पुरस्कारबाट सम्मानित हुनुभएको छ ।
सो अवसरमा प्रधानमन्त्री ओलीले सगरमाथा आरोही वाङको पछिल्लो पुस्तकले नेपालको पर्वतीय पर्यटनलाई विश्वमा प्रवद्र्धन गर्नुका साथै नेपाल र चीनबीचको मैत्रीपूर्ण सम्बन्धलाई थप उचाइमा पुरयाउन मद्दत पुग्ने बताउनुभयो ।
नेपाल र चीनबीचको लामो पारस्परिक, सांस्कृतिक र भौगोलिक सम्बन्ध रहिआएको चर्चा गर्दै प्रधानमन्त्री ओलीले पर्वतारोहणसम्बन्धी वाङको पुस्तकले आपसी सम्बन्धलाई मजबुत तुल्याउन उपयोगी हुने उल्लेख गर्नुभयो ।
प्रधानमन्त्री ओलीले भन्नुभयो– “सगरमाथासहितका सात महादेशका हिमाल चढ्ने उहाँको जोसपूर्ण साहसलाई म कदर गर्छु । म आश्चर्यचकित भएको छु उहाँको सक्रियता र साहसप्रति ।”
प्रधानमन्त्री ओलीले प्राकृतिक विपत्तिले दुई वर्ष आरोहण अवरुद्ध भई पुनः यस वर्षको वसन्त ऋतुमा सगरमाथासहितका हिमालको उत्साहजनक सफल आरोहणले आगामी दिनमा नेपालको पर्यटनले सफलता पाउने विश्वाससमेत व्यक्त गर्नुभयो ।
नेपालका लागि चिनीयाँ राजदूत वु छुन्ताई चीन र नेपालको कूटनीतिक सम्बन्धलाई थप प्रगाढ तुल्याउन आरोही वाङको पुस्तक सान्दर्भिक हुने बताउनुभयो ।
उहाँले नेपालका हिमालको सांस्कृतिक महत्व र रहनसहनले दुई देशबीचको जनस्तरको सम्बन्धलाई उजागर गरेको पनि उल्लेख गर्नुभयो ।
नेपाल पर्यटन बोर्डका प्रमुख कार्यकारी अधिकृत दीपकराज जोशी, नेपाल माउन्टेन एकेडेमीका कार्यकारी निर्देशक लाक्पा फुटी शेर्पा र एभरेस्ट फ्युचर फाउन्डेसनका अध्यक्ष फुर्वा ग्याल्जेन शेर्पाले आरोही वाङको पुस्तकले नेपालको पर्वतीय पर्यटनलाई विश्वमा पहिचान र प्रवद्र्धन गर्न थप सहयोग पुग्ने विश्वास व्यक्त गर्नुभयो ।
