मंगलबार, कार्तिक ११ २०७७ | Tue, October 27, 2020
नेपालको समय: १८:१६ | UK Time: 12:31

छात्राबासमा आगोलाग्दा १७ बालिकाको ज्यान गयो

वीनेपाली
२०७३ जेठ १० गते १०:४९

बैंकक, १० जेठ । उत्तरी थाइल्याण्डमा अवस्थित एक विद्यालयको आवासीय भवनमा आगो लाग्दा त्यसमा रहेका १७ जना बालिकाको ज्यान गएको समाचार छ ।

सो विद्यालय कन्या विद्यालय हो । उक्त विद्यालयमा अध्ययन गर्ने बालिका बस्ने गरेको भवनमा आइतबार राति आगो लागेको थियो ।

त्यसमा परी १७ जनाको ज्यान जानुका साथै अरु पाँचजना जलेर घाइते भएका छन् । साथै आगो लागेर भवन भत्किँदा त्यसमा रहेका दुई जना बालिका अझै हराएको समाचारमा जनाइएको छ ।
उत्तरी थाइल्याण्डको जियाङ राइ भन्ने स्थानमा सो विद्यालय रहेको छ । सोमबार थाइल्याण्डको एक पत्रिकाले सो समाचार दिएको छ ।

आइतबार राति करिब ११ बजे उक्त भवनमा आगो लागेको थियो । आगोमा जलेर मृत्यु भएका बालिका १० देखि १२ वर्षसम्मका रहेका छन् ।

उक्त बोडिङ् स्कुलमा ३८ जना बालिका अध्ययनरत रहेका छन् । उनीहरु थाइल्याण्डको जियाङ माइ गाउँबाट अध्ययनका लागि यहाँ आएका हुन् । आगोको मुस्लो बढेपछि त्यहाँ रहेका बालिकालाई उद्वारकर्मीले पनि उद्वार गरी बाहिर ल्याउन सकेका थिएनन् ।

आगो लाग्नुको कारण थाहा हुन सकेको छैन । त्यस विषयमा अनुसन्धान भइरहेको प्रहरीले जानकारी दिएको छ । तर प्रारम्भिक अनुसन्धानमा पाइएअनुसार विद्युतीय गडबडीका कारण राति अकस्मात आगो लागेको पाइएको छ ।

प्रतिक्रिया

सम्बन्धित सामाग्री

फेसबुक