बिहीबार, कार्तिक ६ २०७७ | Thu, October 22, 2020
नेपालको समय: ०९:१४ | UK Time: 04:29

बुद्ध जयन्तीमा शान्ति पदयात्रा, बुद्ध पूजा

वीनेपाली
२०७३ जेठ ८ गते १८:४०
विभिन्न बौद्ध सङ्घ संस्थाले २५६० औँ बुद्धजयन्तीको अवसरमा बौद्ध परिसरमा निकालेको बुद्धको रथ यात्रामा सहभागीहरु । तस्बिर ः अन्जलि रम्तेल, रासस

विभिन्न बौद्ध सङ्घ संस्थाले २५६० औँ बुद्धजयन्तीको अवसरमा बौद्ध परिसरमा निकालेको बुद्धको रथ यात्रामा सहभागीहरु । तस्बिर ः अन्जलि रम्तेल, रासस

काठमाडौँ, ८ जेठ । पच्चीसय साठीऔँ वुद्ध जयन्तीका उपलक्षमा देशका विभिन्न भागमा पदयात्रा, वुद्य पूजा आदि कार्यक्रम भएका छन् ।

पोखरा – यसै सन्दर्भमा आज पोखराका विभिन्न ठाउँमा रहेका विहार, गुम्बा र चैत्यमा परम्परागत रुपमा बुद्ध पूजा गरिएको छ ।

भिक्षु, लामा र बज्राचार्यले आज बिहानैदेखि ती धार्मिक संस्थामा पंचशील प्रार्थना र पूजा गरी विश्व शान्तिको कामना गर्नुभयो ।

त्यस्तै, बुद्ध जयन्ती मूल समितिको आयोजनामा आजै दिउँसो शान्ति पदयात्रा र धार्मिक सभा सम्पन्न भएको छ ।

पोखराको नदीपुरस्थित धर्मशीला वुद्ध विहारबाट सुरु भएको शान्ति पदयात्रा रयालीले नगर परिक्रमा गरी शाक्य समाजको सभाहलमा पुगी सभामा परिणत भएको थियो ।

रयालीमा बौद्ध सङ्घसंस्थाका भक्तजन, भन्ते, लामा, भिक्षुलगायत सर्वसाधारणको उल्लेख्यरुपमा सहभागिता रहेको थियो । कार्यक्रममा भिक्षु सागर धम्म र अनागरिका सुभाले गौतम बुद्धको उपदेश अहिले पनि त्यत्तिकै महत्व राख्ने गरेको धारणा राख्नुभयो । कार्यक्रमको सभापतित्व मूल समारोह समितिका अध्यक्ष कृष्णमान गुभाजुले गर्नुभएको थियो ।

सोही उपलक्ष्यमा बौद्ध अघौ सदनमा पनि सप्ताहव्यापी रुपमा विविध कार्यक्रम गरियो ।

सो अवसरमा विभिन्न तालमा माछाका भुरा छोड्ने, वृद्धाश्रममा भोजन दान, प्रवचन, सरसफाइ र वृक्षरोपणसमेत गरिएको थियो ।

तनहूँ– बुद्ध जयन्तीका अवसरमा शनिबार दमौलीमा पनि शान्ति रयाली निकालियो । बौद्ध सदन तनहुँको आयोजनामा निकालिएको सो रयालीमा विभिन्न वेषभूषामा सजिएका गुरुङ समुदायका व्यक्तिको ठूलो सङ्ख्यामा सहभागिता रहेको थियो ।

व्यास–१० देउरालीनगरस्थित गुम्बाबाट सुरु भएको रयाली दमौली बजारको परिक्रमा पछि सोही ठाउँमा पुगेर सभामा परिणत भएको थियो । शान्तिका अग्रदूत भगवान् गौतम बुद्धले देखाउनुभएको शान्ति र अहिंसाको बाटो हिँड्नसकेमात्रै देशमा शान्ति आउनेमा वक्ताको जोड थियो । नेपाली काँग्रेसका केन्द्रीय सदस्य एवम् सांसद शङ्कर भण्डारीले कार्यक्रमको उद्घाटन गर्दै शान्तिका अग्रदूत भगवान् गौतम बुद्धले देखाएको बाटो हिँड्नसके विश्वभर शान्ति आउने बताउनुभयो ।

सो कार्यक्रममा बौद्ध सदन गुम्बाका उपाध्यक्ष जितलाल गुरुङ, दीपक भट्टराई, कुमार गुरुङ, मिरसिंह गुरुङलगायतले विश्व शान्तिको कामना गरेका थिए ।
इटहरी– बुद्ध जयन्तीका अवसरमा सुनसरी जिल्लाको इटहरी र धरान उपमहानगरपालिका क्षेत्रमा बृहत् रयालीसहित भगवान् गौतम बुद्धको जयन्ती मनाइएको छ । बौद्धमार्गीको विशाल सहभागितामा बाजागाजासहित बुद्ध जयन्ती मनाइएको छ ।

बुद्ध गुम्बा इटहरी तमु सेवा समितिबाट निकालिएको विशाल जनसहभागितासहितको रयालीले इटहरी उपमहानगरपालिका क्षेत्रका परिक्रमा गरेर पुनःसोही गुम्बामा पुगेर समारोहमा परिणत भएको थियो ।

भगवान् गौतम बुद्धले अघि सार्नुभएको अहिंसा तथा सम्पूर्ण जीवजन्तु र मानव कल्याणका पक्ष दिनु भएको बुद्ध शान्ति सन्देशलाई सबै मानिसले अनुशरण गर्न सकेको अवस्थामा मानव सभ्यता साँच्चै सुन्दर हुने विभिन्न वक्ताले सहभागीलाई स्मरण गराउनुभयो ।

होमबहादुर घलेको अध्यक्षतामा भएको कार्यक्रममा केशरमान गुरुङ, मीनाकुमारी गुरुङ, देवबहादुर श्रेष्ठ, चन्द्र गोम्देन, जङ्गबहादुर तामाङ, रुद्रबहादुर गुरुङलगायतले बोल्नुभएको थियो । उता धरानमा पनि बौद्धमार्गीको विशाल जनसहभागिता रहेको रयालीले धरान उपमहानगरपालिका क्षेत्रमा परिक्रमा गरेर बुद्ध जयन्तीलाई भव्यताका साथ मनाएका छन् ।

प्रतिक्रिया

सम्बन्धित सामाग्री

फेसबुक