बुद्धका वचन मानव जीवनका लागि मार्ग निर्देशक

काठमाडौँ, ८ जेठ । भगवान् बुद्धका वचन मानवजीवनका लागि मार्ग निर्देशक सिद्धान्त बन्न सक्नेमा बौद्ध धर्मगुरुहरुले जोड दिनुभएको छ ।

२५६० औँ बुद्धजयन्तीको अवसरमा आज बौद्धनाथ क्षेत्र विकास समितिले आयोजना गरेको ‘मानव जीवनमा बुद्ध वचनको महत्व’ विषयक प्रवचन कार्यक्रममा धर्म गुरुहरुले यस विषयमा जोड दिनुभयो ।

खेन्पो जोर्देन, लोबोन बाबा सम्ज्योर, खेन्पो फुङ्छोक दोर्जे लामा, दोर्जे लोबोन केल्साङ र साङदेन रिन्पोछेले अन्य जीवको भन्दा मानवजीवनको महत्व बढी भएकाले जीवन यात्रालाई सही रुपमा अगाडि डो¥याउन बुद्ध वचनलाई पालना गर्नुपर्ने बताउनुभयो ।

सो अवसरमा समितिले प्रकाशन गरेको पुस्तक बौद्ध महाचैत्य (द ग्रेट बौद्ध स्तुप) को विमोचन गरियो । पुस्तकको लेखन विनोद कार्की र सविन श्रेष्ठले गर्नुभएको होे । पुस्तकका बारेमा मन्तव्य राख्दै लेखक कार्कीले बौद्ध स्तुपको बारेमा ज्ञान लिन चाहने विदेशी पर्यटकका लागि आवश्यक सूचना सङ्कलन गरिएको सुनाउनुभयो ।

यसअघि आज बिहान बुद्धको मूर्ति र अस्थिधातु सहितको ¥यालीले बौद्ध क्षेत्र परिक्रमा गरेको थियो । अस्थिधातुलाई अहिले बौद्धको गुरु ल्हाखाङ गुम्बामा प्रदर्शनमा राखिएको छ । गुम्बामा आज बेलुकीसम्म अस्थिधातु प्रदर्शनमा राखिने बौद्ध घ्याङ गुठीका सचिव किरणकुमार लामाले जानकारी दिनुभयो । अस्थिधातुलाई बुद्धजयन्तीका दिनमा मात्र सर्वसाधारणका लागि प्रदर्शनमा राख्ने गरिएको छ ।

कार्यक्रममा समितिका अध्यक्ष सम्पूर्णकुमार लामा, कार्यकारी निर्देशक फबुयाङ्जी लामालगायतका वक्ताले बुद्ध वचनलाई दैनिक जीवनमा उतार्न आग्रह गर्नुभयो ।

बेलुकी बौद्ध क्षेत्रमा सांस्कृतिक झाँकी, वेशभूषा र बाजागाजासहित बुद्धमूर्तिको शोभायात्रा निकालिने समितिले जनाएको छ ।