प्रधानमन्त्रीसँग चिनियाँ सञ्चारमन्त्रीको भेटवार्ता

काठमाडौँ, ३१ वैशाख । प्रधानमन्त्री केपी शर्मा ओलीसँग आज नेपाल भ्रमणमा रहनुभएका चीनका सञ्चारमन्त्री क्वाई फुचाओले शिष्टाचार भेटवार्ता गर्नुभएको छ ।

प्रधानमन्त्री निवास बालुवाटारमा बिहान भएको भेटवार्तामा उहाँहरुबीच द्विपक्षीय सम्बन्ध, आपसी हित, पारस्परिक सहयोगलगायत विषयमा छलफल भएको थियो ।

भेटमा दुई देशबीचका सञ्चारमाध्यमको सहकार्य र विकास तथा पत्रकारहरुको भ्रमण आदानप्रदानलगायत विषयमा छलफल भएको थियो ।

दुई देशबीचको सूचना प्रविधि आदान प्रदान, प्रेस, फिल्म र टेलिभिजनलाई कसरी साझेदारीका साथ प्रवद्र्धन गर्ने भन्नेबारे कुराकानी भएको प्रधानमन्त्रीका परराष्ट्र मामिला सल्लाहकार गोपाल खनालले सञ्चारकर्मीलाई जानकारी दिनुभयो ।

प्रधानमन्त्री ओलीले चिनियाँ मन्त्रीको नेपाल भ्रमणले दुई देशको सम्बन्ध विकासमा थप सहयोग पुगेको उल्लेख गर्दै सूचना प्रविधिको क्षेत्रमा चीनले गरेको प्रगतिको अनुभव र सहयोगबाट नेपालको आधुनिकीकरणमा मद्दत पुग्ने विश्वास व्यक्त गर्नुभयो ।

प्रधानमन्त्रीले नेपालमा पर्यटनको ठूलो सम्भावना रहेकाले चिनियाँ सञ्चारमाध्यममार्फत चिनियाँ पर्यटकलाई नेपाल भ्रमणमा प्रेरित गर्न आग्रह गर्नुभयो । उहाँले भन्नुभयो – “हामी चीनको विकास र अनुभवबाट लाभ लिन चाहन्छौँ । हामी चीनसँग सहकार्य र सहयोगको थप अपेक्षा गर्दछौँ ।”

प्रधानमन्त्रीले विभिन्न माध्यमबाट नेपाल–चीनबीचको कनेक्टिभिटी रहेको र हिजो मात्र नेपाल र चीनबीच अप्टिकल फाइबरको सञ्जाल स्थापित भएको बताउनुभयो ।

उहाँले आफ्नो चीन भ्रमणका बेला भएका सम्झौता र समझदारीको कार्यान्वयन गर्न मन्त्रिपरिषद्ले एक उच्चस्तरीय कार्यदल गठन गरेको जानकारी पनि चिनियाँ सञ्चारमन्त्रीलाई जानकारी गराउनुभयो । उहाँले भूकम्पका बेला चीन सरकारले पु¥याएको सहयोग र अहिले पुनःनिर्माणमा पुरयाइरहेको सहयोगको प्रशंसा पनि गर्नुभयो ।

प्रधानमन्त्री ओलीले चीनले लिएको ‘एक क्षेत्र एक मार्ग’को नीतिले चीनको मात्र होइन, छिमेकीको समेत विकासमा सहयोग पुग्ने विश्वास व्यक्त गर्नुभयो ।

प्रधानमन्त्रीले निकट भविष्यमा चीनका राष्ट्रपतिलाई नेपालमा स्वागत गर्न नेपाल सरकार र नेपाली जनता प्रतीक्षारत रहेको पनि बताउनुभएको प्रधानमन्त्रीका प्रेस सल्लाहकार दाहालद्वारा जारी विज्ञप्तिमा उल्लेख छ ।

भेटका अवसरमा चीनका सञ्चारमन्त्री फुचाओले चीन र नेपाल दुई असल छिमेकी भएको र दुई देशको सम्बन्ध ऐतिहासिक रहेको उल्लेख गर्दै चीनको सिसिटिभीले सात शृङ्खला लामो ‘नेपाल जाऔँ’ भन्ने वृत्तचित्र निर्माण र प्रसारण गरेर नेपालप्रति चिनियाँको आकर्षण बढाएको बताउनुभएको थियो ।

उहाँले गत चैतमा प्रधानमन्त्रीले गर्नुभएको चीन भ्रमणका बेला दुई देशबीच भएका सम्झौता र समझदारीको व्यवहारमा कार्यान्वयन गर्नका लागि पनि आफ्नो भ्रमण केन्द्रित रहेको प्रधानमन्त्रीका प्रेस सल्लाहकार प्रमोद दाहालले जानकारी दिनुभयो ।

त्यसैगरी मन्त्री फुचाओले प्रधानमन्त्री ओलीको चीन भ्रमणका बेला चीनका राष्ट्रपतिसँग भएको भेटवार्ताले भविष्यमा दुई देशको सम्बन्धलाई थप विस्तार र विकास गर्न मद्दत पुगेको पनि उल्लेख गर्नुभएको थियो ।

सो क्रममा चिनियाँ सञ्चारमन्त्रीले दुई देशका सञ्चार क्षेत्रको विकास, नेपालको सञ्चार क्षेत्रको पूर्वाधार विकासमा सहयोग, तालिम र भ्रमण आदान प्रदानका लागि चीन सरकार नेपाल सरकारसँग सहकार्य गर्न तत्पर रहेको बताउनुभयो ।